Analisti Richard Cramer, një bashkëpunëtor në Institutin e Kërkimeve të Politikës së Jashtme të SHBA (FPRI), thotë se qasja për të parandaluar ndikimin keqdashës të huaj shpesh fillon me pyetjen se si të luftohet korrupsioni institucional.
“Mënyra se si funksionojnë vende si Kina, Rusia dhe Irani bazohet në jotransparencë, marrëveshje sekrete dhe shpesh marrëveshje që nuk ndahen me publikun, siç janë planet në projekte të ndryshme infrastrukturore siç kemi parë në Mal të Zi, Maqedoninë e Veriut dhe gjetkë. Është sigurisht pjesë e iniciativës së Kinës “Belt and Road”, por edhe e marrëveshjeve ruse.
Rusët gjithashtu duan pikërisht llojin e praktikave korruptive të biznesit që kam përshkruar. Kryerja e biznesit në një mënyrë të përgjegjshme dhe transparente, dhe mbështetja e qeverisë për tregtinë dhe investimet në ato zona, janë thelbësore për parandalimin e aktorëve malinj antidemokratikë që të destabilizojnë ose ushtrojnë shumë ndikim në vendet e Ballkanit Perëndimor, në mënyrë që qytetarët e atyre vendet, përmes votimit dhe shoqërisë civile, vendosin se në çfarë lloj vendi duan të jetojnë”, thotë Kremer.
Kujtojmë se projektligji amerikan për Ballkanin Perëndimor, nëse miratohet do të ketë koordinim të ngushtë me partnerët në BE, Mbretëri të Bashkuar e aleatë të tjerë sa i përket vendosjes së sanksioneve ndaj personave dhe entiteteve në këtë rajon, që nuk u përmbahen vlerave demokratike.
SHBA-ja, përmes urdhrave ekzekutivë, ka sanksionuar liderë e entitete në Bosnjë e Hercegovinë, në lidhje me shkeljet e Marrëveshjes së Paqes së Dejtonit, përfshirë edhe liderin e serbëve të Bosnjës, Millorad Dodik. Projektligji thotë se vendosja e sanksioneve ka për synim të pengojë aktivitetet destabilizuese në shtetet e Ballkanit Perëndimor.
