Pak minuta para nisjes së protestës, qytetarët janë mbledhur në bulevardin “Dëshmorët e Kombit” për të protestuar kundër qeverisë dhe kryeministrit Edi Rama.
Protesta, e cila pritet të nisë në orën 17:30 është thirrur nga grupi i Rithemelimit dhe partitë e tjera opozitare.
Qytetarëve në bulevard i është bashkuar edhe deputeti i Partisë Demokratike, Ervin Salianji, i cili shihet duke diskutuar me disa protestues.
Salianji para nisjes së protestës së opozitës përcolli një mesazh, duke thënë se qytetarët sot protestojnë për të njëjtat liri dhe të drejta si 33 vite me parë.
Në një prononcim për media, deputeti demokrat u shpreh se protesta e sotme është jo vetmë simbolikë, pasi në këtë datë u rrëzua busti i diktatorit, por tha se është edhe një ditë e jashtëzakonshme për nga pjesëmarrja dhe masiviteti.
“Është një ditë e jashtëzakonshme jo vetëm nga simbolika që mban në 33 vjetorin e rrëzimit të bustit, por edhe në mbledhjen dhe masivitetin dhe simbolikën që përçon mbledhja e qindra mijëra qytetarëve që bëhen bashkë për të kërkuar të njëjtat liri dhe të drejtat, demokraci, liri, pluralizëm dhe votë të ndershme”, tha Salianji.
