Kryetari i Organizatës së Veteranëve të Luftës së UÇK-së (OVL-UÇK), Hysni Gucati, ka reaguar pas arrestimit të Serbi të ish-ushtarit të UÇK-së, Mithat Llozhani.
Ai edhe një herë iu ka bërë thirrje qytetarëve dhe ish-ushtarëve të UÇK-së që të mos kalojnë nëpër Serbi.
Në një prononcim për Ekonomia Online, ai ka thënë se nuk e di se kur mund të lirohet Llozhani.
“Kemi bërë një apel veteranëve sidomos, familjeve të dëshmorëve, mos i bini nëpër territorin serb se duke parë këto listat që i ka Serbia, tash në dorë që i ka ndërru, tani duke bërë verifikim, vetëm duke i ndalë pjesëtarët e UÇK-së. Edhe a i ndalë pjesëtarët e UÇK-së vetëm me tregu pak forcën që unë e bëj këtë punë. Ka këtë mundësi me i ndalë njerëzit, një vit, dy vjet apo sa po i ndalin nëpër burgje. Tani, unë nuk e di deri kur duhet me u bind veteranët, apo te kur duhet me u vetëdijësu, ne duke bërë apel. Ne i kemi përbetu në Zot, mos shkoni nëpër territor të Serbisë. As qytetarë është mire mos me i ra, se lëre më pjesëtarë të UÇK-së me i ra nëpër territorin serb me shku asajde”, ka thënë Gucati.
SPAK përfundon parashtrimet në gjyqin paraprak ndaj Ilir Metës, Monika Kryemadhit, Pirro Xhixhës, Ema Çokut dhe Fatime Kryemadhit
Siç bëjnë me dije burimet, prokurori i çështjës në procesin me dyer të mbyllura që po zgjat prej disa orësh, prokurori Sotir Kllapi, i kërkoi gjykatës paraprake të kalojë në gjykim themeli dosjen me 5 të akuzuar, ndaj të cilëve janë rëndojnë akuzat e korrupsionit të pastrimit të parave.
Aktualisht në gjyq po flet ish-presidenti Ilir Meta.
Deputeti i Partisë Demokratike, Saimir Korreshi, ka ngritur akuza të forta ndaj funksionimit të Gjykatës Kushtetuese, duke e cilësuar situatën aktuale si një “tragjikomedi” ku gjykata ekziston formalisht, por vendimet mungojnë qëllimisht. I ftuar në një studio televizive, Korreshi tha se Shqipëria ka kaluar tre vite pa një Gjykatë Kushtetuese funksionale dhe se kjo logjikë, sipas tij, po vijon edhe sot.
Sipas deputetit opozitar, Gjykata Kushtetuese mblidhet, regjistron ditët e punës, por shmang marrjen e vendimeve për çështje të ndjeshme, si ajo e Ballukut. Korreshi theksoi se kjo zvarritje nuk është rastësore, por ka një prapavijë të qartë politike.
Ai deklaroi se frika më e madhe e kryeministrit Edi Rama lidhet me një vendim të mundshëm pozitiv të Gjykatës Kushtetuese, i cili mund t’i hapë rrugë SPAK-ut për të kërkuar pezullimin e tij nga detyra. “Kjo është arsyeja pse nuk jepet vendimi. Është një investim i Ramës për të mos u pezulluar,” u shpreh Korreshi.
Deputeti i PD-së kritikoi gjithashtu procesin e rekrutimit të gjyqtarëve dhe prokurorëve të rinj, duke pretenduar se ata janë përzgjedhur përmes lidhjeve nepotike dhe favoritizmit me qeverinë, çka sipas tij ka ulur ndjeshëm cilësinë e sistemit të drejtësisë.
Korreshi solli në vëmendje edhe çështje të tjera që, sipas tij, vuajnë nga mungesa e kontrollit dhe transparencës, si buxheti i inceneratorëve dhe cilësia e rrugëve publike. Ai përmendi shembuj konkretë, si problemet në tunelin e Murrizit dhe dëmtimet e infrastrukturës rrugore, ndërsa fondet publike, sipas tij, vazhdojnë të shpenzohen pa llogaridhënie.
Në përfundim, Korreshi shprehu shqetësimin se mosfunksionimi real i institucioneve të drejtësisë po rrit pasigurinë dhe mosbesimin e qytetarëve, duke paralajmëruar se pas përfundimit të mandateve trevjeçare të prokurorëve dhe gjyqtarëve të posaçëm, vendi mund të përballet me pasoja edhe më të rënda për shtetin e së drejtës.
Gjatë vizitës 3-ditore në Izrael midis datave 25-27 janar, kryeministri Edi Rama udhëtoi vajtje e kthim me një avion privat, dikur në pronësi të themeluesit të bursës së kriptovalutave FTX, e cila falimentoi në mënyrë spektakolare në nëntor 2022.
Avionët privatë reaktivë për distanca të gjata, të cilët përdoren nga elitat globale të biznesit dhe politikës, nuk janë thjesht mjete udhëtimi. Ata shërbejnë si një metaforë e hendekut midis njerëzve të pasur dhe të pushtetshëm dhe pjesës tjetër të shoqërisë, e cila pret me durim në terminal për të marrë aeroplanin e linjës.
Në Shqipëri, dikur një vend i izoluar dhe ende i varfër ku vetëm një grup i vogël njerëzish udhëtonte jashtë vendit për dekada simbolika e përdorimit të një aeroplani privat është më e fortë, në mënyrë të veçantë kur këto udhëtime bëhen nga zyrtarë publikë si kryeministri Edi Rama, shpesh larg syve kureshtarë të publikut.
Udhëtimi i fundit i liderit jetëgjatë shqiptar në vizitën shtetërore tre-ditore në Izrael me rastin e pjesëmarrjes së tij në Konferencën Ndërkombëtare për Luftën kundër Antisemitizmit, u realizua nëpërmjet avionit ‘Bombardier Global 5000’, dikur në pronësi të Sam Bankman Fried, një sipërmarrës amerikan i dënuar për mashtrim dhe pastrim parash.
Kjo nuk është hera e parë që Rama përdor një avion privat për udhëtimet e tij zyrtare. Për vite me radhë, ai shfrytëzoi një Airbus A319-100 të konfigurimit VIP nga kompania e flamurit ‘Air Albania’, i pagëzuar me emrin ‘Ismail’, në nder të themeluesit të shtetit shqiptar, Ismail Bej Vlora.
Përfaqësues të mazhorancës argumentojnë se përdorimi i një “avioni qeveritar” për udhëtime zyrtare nga kryeministri lidhet me “dinjitetin” e shtetit shqiptar dhe përfaqësimin e tij në arenën ndërkombëtare.
Kritikët e Ramës nga radhët e opozitës mendojnë të kundërtën, ndërsa theksojnë se dinjiteti që gëzon një zyrtar publik qoftë brenda apo jashtë vendit nuk lidhet me luksin e mjeteve të transportit të përdorura prej tij.
“Dinjiteti i vendit tonë, fatkeqësisht, cenohet përditë e më shumë nga një kryeministër dhe një qeveri e korruptuar dhe e papërgjegjshme, që kohët e fundit u kanë hyrë edhe aventurave gjeopolitike për hir të interesave të ngushta politike,” tha Arlind Qori, kreu i Lëvizjes Bashkë.
I pyetur nga BIRN, Rama e lidhi përdorimin e një avioni privat për udhëtimin e tij në Izrael me çështjen e sigurisë.
“Udhëtimi në Izrael ka pasur edhe elemente të mirëkuptueshme sigurie të veçantë dhe transporti ka qenë pjesë e këtyre elementëve,” tha ai, nëpërmjet një zëdhënëseje. “Shpenzimet nuk janë mbuluar nga qeveria shqiptare,” shtoi Rama, pa specifikuar se kush i kishte mbuluar ato.
Qeveria e Izraelit nuk iu përgjigj një kërkese për koment nga BIRN nëse ishte ajo që e kishte paguar fluturimin e kryeministrit shqiptar për në Tel Aviv.
Një vizitë ‘historike’
Kryeministri Edi Rama mban fjalim në Knesset
Tre dekada pas rënies së regjimit komunist, i cili e izoloi vendin për gati gjysmë shekulli, Shqipëria mbetet një nga vendet më të varfra në Europë, me të ardhura për frymë pak më të larta se Moldavia dhe Kosova.
Edi Rama është një nga politikanët që ka shenjuar periudhën e tranzicionit, duke udhëhequr prej vitit 2013 si kryeministër, ndërsa siguroi një mandat të katërt të paprecedentë në zgjedhjet e vitit 2025.
Megjithatë, pavarësisht sukseseve në zgjedhje, të cilat i detyrohen shumë transformimit të Partisë Socialiste në një makineri elektorale, qeveria e drejtuar nga Rama është përndjekur nga akuzat për korrupsion në nivelet më të larta ekzekutive të saj – përfshirë marrjen të pandehur të zëvendëskryeministres Belinda Balluku për shkelje të barazisë në tendera.
Në klimën e një përballjeje mes pushtetesh për imunitetin e Ballukut, vizita shtetërore në Izrael përbënte një mundësi të artë për kryeministrin për të lëmuar imazhin e tij të dëmtuar.
Së bashku me kryeministrin në Izrael udhëtoi edhe bashkëshortja e tij, Linda Rama, zëvendësministrja e Punëve të Jashtme, Megi Fino, dhe shefja e Shërbimit Informativ Shtetëror (SHISH), Vlora Hyseni.
Stacioni i parë i vizitës në Izrael me 25 janar ishte ‘Nova Site’, afër Kibutz Re’im në jug të Izraelit, vendi ku nisi sulmi i Hamasit më 7 tetor 2023 dhe u vranë 378 të rinj që merrnin pjesë në festivalin muzikor.
Më 26 janar, kryeministri shqiptar u prit në një takim në Tel Aviv nga homologu i tij, Benjamin Netanyahu, i cili po përballet gjithashtu me akuza për korrupsion në Izrael dhe është subjekt i një kërkese arresti ndërkombëtar nga Tribunali Penal Ndërkombëtar për krime lufte në Gaza. Ai i ka kundërshtuar me forcë të dyja akuzat.
Në të njëjtën ditë, kryeministri shqiptar iu drejtua me një fjalim parlamentit izraelit, ku ai theksoi lidhjet historike midis dy popujve, përfshirë ndihmën që shqiptarët dhanë për popullin hebre gjatë Luftës së Dytë Botërore. Media proqeveritare në Tiranë nxituan ta shpallnin fjalimin e tij si “historik”.
Më 27 janar, Rama mori pjesë në një konferencë ndërkombëtare për luftën kundër antisemitizmit, përpara se të kthehej në atdhe.
Sipas të dhënave të aplikacionit “Flightradar”, avioni “Bombardier Global 5000” u nis nga “Nënë Tereza” në Rinas të dielën, më 25 janar, në orën 10:53 dhe arriti në aeroportin Ben Gurion të Tel Avivit në orën 13:55.
I njëjti mjet fluturues udhëtoi të martën, më 27 janar, përsëri drejt Tiranës, ku u ul në orën 20:33. Menjëherë pas uljes së avionit në aeroportin “Nënë Tereza”, eskorta e kryeministrit Edi Rama u pa të largohej nga terminali VIP.
Avioni i multimiliarderit të kriptovalutave
Sam Bankman Fried
Avioni Bombardier Global 5000 me numër “N410AT”, i regjistuar në Administratën Federale të Aviacionit (FAA) në SHBA, është një avion reaktiv biznesi i kategorisë ‘ultra long range’, i prodhuar nga kompania kanadeze Bombardier Aerospace në vitin 2008.
Ky model konsiderohet një nga avionët më luksozë dhe më të aftë për fluturime ndërkontinentale në segmentin e tij. Të dhënat e pronarit aktual të avionit janë anonimizuar nga FAA në bazë të “Titullit 49 të Kodit të Shteteve të Bashkuara, Seksioni 44114,”, e cila është një dispozitë e ligjit federal amerikan që rregullon regjistrimin e avionëve në Shtetet e Bashkuara dhe lejon që, këta të fundit, të mbeten anonimë.
Ndryshe, për pronarët e mëparshëm të këtij mjeti fluturues dihet më shumë, pasi avioni ka qenë objekt i një procesi ligjor në SHBA, pas kolapsit të bursës së kriptovalutave FTX, the arrestimin të themeluesit të saj, Sam Bankman Fried, i njohur gjithashtu me nofkën ‘SBF’.
Avioni ‘Bombardier’ ishte blerë nga FTX nëpërmjet kompanisë Trans Island Airways në vitin 2021, për vlerën 15.9 milionë dollarë. FTX gjithashtu zotëronte një tjetër avion privat të llojit “Embraer Legacy” më vlerë 11.2 milionë dollarë. Të dy mjetet u sekuestruan në vitin 2023.
Në mars 2024, Bankman-Fried u dënua në Shtetet e Bashkuara të Amerikës me 25 vjet burg, i ngarkuar me shtatë akuza penale për mashtrim dhe komplot. Themeluesi i bursës FTX dhe kompanisë së investimeve ‘Alameda Research’, SBF ishte një nga figurat kyçe të tregut të kriptovalutave.
Bursa e kriptovalutave FTX kolapsoi në nëntor 2022, pas publikimit të akuzave për mashtrim dhe korrupsion, të cilat çuan në tërheqje masive të fondeve nga klientët. Bankman-Fried u arrestua dhe u ekstradua në dhjetor të të njëjtit vit në SHBA.
Në shkurt 2025, Gjykata Federale e Distriktit Jugor të Nju Jorkut nxori një vendimin përfundimtar konfiskimi për pasurinë e SBF, për një vlerë të barabartë me 1 miliard dollarë, përfshirë dy avionët e tij privatë.
Mungesë transparence
Bombardier Global 5000
Avionët privatë zënë një vend të veçantë në tregun e shërbimeve të luksit, duke qenë një simbol ekskluziviteti, ndaj të cilit shumë pak njerëz mund të kenë qasje.
Kjo industri përfitoi një ngritje të madhe gjatë pandemisë globale të COVID-19 dhe ka regjistruar rritje të fortë edhe në vitet që pasuan. Sipas kompanisë së inteligjencës financiare “Wing X”, ajo vlerësohej në 39.8 miliardë dollarë në vitin 2025.
Megjithë zhvillimin e tregut të fluturimeve private, ky sektor ka tërhequr edhe kritika, për shkak të ndikimit në mjedis dhe shkarkimeve të larta të dioksidit të karbonit në atmosferë.
Në Shqipëri, kritikat, të cilat kanë shënjestruar kryesisht kryeministrin Edi Rama për përdorimin e avionëve privatë, kanë qenë më me këmbë në tokë. Ato lidhen gjerësisht me transparencën e shpenzimeve publike për transport nga kreu i qeverisë.
Që kur mori Presidencën e OSBE-së për një periudhë 1-vjeçare në vitin 2020, kryeministri ka përdorur për udhëtime zyrtare një avion të kompanisë së flamurit “Air Albania”, duke përfituar nga një kontratë kuadër me çmim në kosto për orë fluturimi.
Përdorimi i këtij avioni nga kryeministri dhe shpenzimet për operimin e tij kanë qenë burim akuzash nga opozita e udhëhequr nga Partia Demokratike, e cila ka kërkuar ngritjen e një komisioni parlamentar. Kërkesa e PD-së është hedhur poshtë nga mazhoranca në shkurt 2023.
Në tetor 2025, Këshilli i Ministrave vendosi t’i shpallë sekret të dhënat për udhëtimet e kryeministrit dhe të zyrtarëve të lartë jashtë vendit, duke argumentuar se kjo bëhej për të mbrojtur të dhënat personale.
“Prej atij momenti, qytetarët e kanë humbur të drejtën të dinë se me çfarë mjeti, kostoje apo eskorte udhëton kryeministri i vendit,” shprehet Rigels Xhemollari, drejtues ekzekutiv i “Qëndresa Qytetare”, një organizatë kundër korrupsionit me qendër në Tiranë.
Sipas Xhemollarit, me këtë vendim nuk kemi të bëjmë vetëm me rënien e një standardi etik, por edhe të një standardi demokratik, pasi sipas tij ka humbur llogaridhënia për taksat publike.
“Në momentin që një zyrtar i lartë udhëton me paratë e përbashkëta, ai ka detyrim të publikojë minimalisht kostot dhe kontratat e udhëtimit,” tha ai. “Fakti që kryeministri nuk e bën këtë, nënkupton minimalisht fshehje të kostove dhe maksimalisht abuzim me detyrën,” shtoi Xhemollari.
Falimenti i ‘Air Albania’
Airbus i qeverisë shqiptare në Mynih | Foto kortezi e Moritz Borstell/ shorturl.at/flrR8
Marrëveshjes midis Këshillit të Ministrave dhe kompanisë “Air Albania” për përdorimin e “Ismailit” për fluturime zyrtare i erdhi fundi në dhjetor 2025, pasi kompania ajrore ndaloi së operuari, nën barrën e rreth 50 milionë dollarëve borxhe të akumuluara ndër vite.
Besnik Vathi, themelues i Shoqatës Shqiptare të Turoperatorëve dhe Agjencive Turistike (ATOA), i tha BIRN se falimentimi i Air Albania erdhi si rrjedhojë e faktorëve të jashtëm të tregut dhe menaxhimit të dobët të kompanisë.
Ai theksoi se shumë vende i subvencionojnë kompanitë ajrore të “flamurit”, duke u siguruar fluturime pa konkurrencë në disa destinacione, pasi i konsiderojnë ato shtylla të rëndësishme të zhvillimit të turizmit.
“Ndërsa Air Albania u la të konkurronte në një treg shumë të ashpër – ku prezentë janë Wizz Air dhe Ryanair – dhe u detyrua të punonte në një situatë të vështirë,” tha Vathi. “Menaxhimi ishte anadollak, pa vizion dhe pa koncepte,” shtoi ai, ndërsa theksoi se “pati mungesë vizioni për të krijuar një kompani të suksesshme.”
Ndryshe, kreu i Lëvizjes Bashkë, Arlind Qori, fajëson qeverinë për falimentimin e kompanisë ajrore të flamurit.
“E konsideroj, së paku, politikisht përgjegjës Edi Ramën,” tha ai, ndërsa rikujtoi se vite më parë kryeministri e trumbetonte themelimin e saj si histori suksesi.
Qori ishte gjithashtu kritik për përdorimin e fluturimeve “charter” nga Kryeministria.
“Përdorimi i çarterave privatë është shpërdorim i shpenzimeve nga buxheti i shtetit vetëm për hir të komoditetit të lëvizjes së një kryeministri, i cili në parim, duhet të ishte kryeshërbyesi i popullit, por në fakt përditë e më shumë ka një stil jetese luksoz, në sinkron me autokratët e të shkuarës dhe të tashmes nëpër botë,” tha ai.
“Luksi është antitezë e demokracisë, e cila, aty ku lulëzon, shkon bashkë me thjeshtësinë në paraqitjen publike të zyrtarëve të lartë të shtetit dhe me kursimin e shpenzimeve qeveritare,” shtoi ai.
Edhe Xhemollari ishte i mendimit se përdorimi i fluturimeve private nga qeveria shqiptare nuk i bënte nder reputacionit të kryeministrit.
“Justifikimi i [kreut të Kuvendit Niko] Peleshit për ‘përfaqësim dinjitoz’, apo ai i kryeministrit për të reklamuar kompaninë ajrore, tashmë të falimentuar, janë hije propagande për të justifikuar luksin e udhëtimeve me avionë privatë,” tha ai.
“Dinjitoze për një vend të varfër si Shqipëria do të ishte nëse do të udhëtonte si çdo qytetar i kësaj republike, me avionët që përdorin ata që paguajnë taksat në këtë vend, e jo si baron droge apo si drejtues i vendeve diktatoriale,” përfundoi Xhemollari./BIRN
Në këtë kontekst, ai iu referua edhe mesazheve të forta të Sekretarit të Përgjithshëm të NATO-s, Mark Rutte, lidhur me nevojën për rritjen e shpenzimeve të mbrojtjes, ndarjen e barrës brenda Aleancës dhe rolin udhëheqës të SHBA-së, në një klimë tensionesh politike transatlantike.
Mesazhi qendror i forumit ishte se Evropa është e aftë të mbrohet, por vetëm brenda NATO-s dhe vetëm nëse rrit me shpejtësi shpenzimet për mbrojtjen, kapacitetet ushtarake. U theksua se NATO nuk është një marrëdhënie ku SHBA “shpëton” Evropën apo anasjelltas, por një aleancë e integruar, ku siguria e Evropës, Atlantikut dhe
Arktikut lidhet drejtpërdrejt me sigurinë amerikane. Sipas vlerësimeve të forumit, presioni i ushtruar nga Presidenti Donald Trump ndaj aleatëve evropianë për të rritur shpenzimet e mbrojtjes në 5% të PBB-së, pas dekadash të mungesës së investimeve në mbrojtje.
Ndërkohë, SHBA vijon të mbajë mbi 80 mijë trupa në Evropë, duke mbetur e përkushtuar ndaj Aleancës, por duke kërkuar që Evropa të marrë më shumë përgjegjësi për sigurinë e saj. Mediu theksoj se ndërtimi i një bashkëpunimi politik dhe ushtarak i vendeve të NATOs në Ballkan përfshi dhe Kosovën është domosdoshmëri. Gjatë forumit, Kongresmeni Keith Self u mbështet nga të pranishmit kur kërkoj anëtarësimin e Kosovës në NATO, duke e cilësuar atë si një kontribut të rëndësishëm për sigurinë dhe stabilitetin rajonal.
Një kërcënim tjetër i madh për Ballkanin, Shqipërinë është korrupsioni, krimi i organizuar i lidhur me kartelet e drogës. Këtij forumi ju bashkuan dhjetëra kongresmenë amerikanë, ushtarakëve të lartë amerikanë, eurodeputetëve, përfaqësuesve nga Britania e Madhe, deputetëve të vendeve të Ballkanit, Kryetari I Kuvendit të Shqipërisë Peleshi, Kryetar parlamentesh, deputetë të Bundestagut gjerman, drejtues të EPP-së dhe përfaqësues të Instituti Nderkombëtar Republikan (IRI).
Gjykata e Apelit ka ndryshuar vendimin e Gjykatës Themelore në Prishtinë, duke ua zëvendësuar masën e paraburgimit me arrest shtëpiak shtatë të dyshuarve: ish-ministrit Fadil Ismajli, avokates Mirlinda Bllata-Dibrani, gjyqtarit Jovica Mitroviq, Bedri Dibranit, Shaban Tërbunjës, Naim Krasniqit dhe Goran Llaziq.
Ata dyshohen për veprat penale të keqpërdorimit të pozitës zyrtare, marrjes dhe dhënies së ryshfetit, ushtrimit të ndikimit dhe deklarimeve të rreme.
Sipas vendimit, masa e paraburgimit të dyshuarve iu llogaritet nga 2 shkurti 2026 deri më 18 mars 2026.
Në vendimin e marrë më 2 shkurt 2026, thuhet se të pandehurit detyrohen të qëndrojnë në shtëpitë e tyre apo vendbanimin e tyre dhe nuk kanë të drejtë të largohen, përveç në rastet kur kjo është e nevojshme për përmbushjen e nevojave jetësore apo për shkaqe shëndetësore, dhe vetëm me leje paraprake të gjykatës- gjyqtarit të procedurës paraprake.
Po ashtu, të pandehurit njoftohen se në rast të mosrespektimit të masës së caktuar me këtë vendim, ndaj tyre do të caktohet paraburgimi.
Obligohet Policia e Kosovës- stacionet përkatëse policore që të mbikëqyrin zbatimin e kësaj mase dhe në rast të mosrespektimit ta njoftojnë gjykatën.
Sipas Apelit, lidhur me dyshimin e arsyeshëm, janë dhënë mjaftueshëm sqarime nga shkalla e parë.
Gjykata ka gjetur se përveç dyshimit të bazuar, te të akuzuarit ekziston rreziku që të ndikojnë në provat që ende nuk janë siguruar. Prandaj, Apeli është pajtuar edhe me këtë gjetje të shkallës së parë.
Ndërkaq, dy kushtet e tjera që shkalla e parë i ka konsideruar se plotësohen në rastin konkret- atë të rrezikut të ikjes dhe përsëritja e veprave, sipas Apelit, nuk qëndrojnë. Kjo për faktin se nuk ekziston asnjë dëshmi konkrete apo fakt që do të bënte të kuptohej se në rastin konkret plotësohe dy kushtet në fjalë për caktim të masës së paraburgimit.
Tutje, sipas vendimit të Apelit, adresat e vendbanimit të të pandehurve janë të ditura dhe se ata janë shtetas të Kosovës, si dhe Prokuroria nuk ka ofruar provë konkret që dëshmon rrezikun e ikjes. Ndërkaq, për dy të pandehurit me nacionalitet serb, sipas Apelit, ata jetojnë në Kosovë dhe kanë adresat e tyre të vendbanimit dhe vetëm fakti se janë edhe shtetas të Serbisë nuk e provon rrezikun e arratisjes.
Lidhur me kushtin tjetër- atë të përsëritjes së veprave penale, shkalla e dytë vlerëson se të dyshuarit nuk kanë të kaluar kriminale dhe se ata nuk njihen si përsëritës të veprave.
Prandaj sipas vendimit të Apelit, që është marrë nga gjykatësit Avni Mehmeti- kryetar i Kolegjit, Afërdita Bytyqi dhe Mentor Bajraktari- anëtarë, masa e arrestit shtëpiak është masa adekuate që duhet t’iu caktohet të dyshuarve./BetimipërDrejtësi
Gazetarja Klodiana Lala, ka folur për hetimet e SPAK ndaj Bankers Petroleum.
Lala tha në një emision se çelësi i zbardhjes së aferës, është një bankë në Austri, ndërkohë që tha se po verifikohet roli i ministrave dhe ish-ministrave, që dyshohet se janë të implikuar në aferë.
Po kështu edhe roli i kompanive dhe personave që kanë ndihmuar Bankers të shmangë detyrimet tatimore.
“Ne e kemi mbyllur 2025 me një emision për Bankers. Kam thënë po hetohen disa zyrtarë, ish ministra. Çfarë kam kuptuar nga dosja në SPAK, thelbi është një bankë e nivelit të dytë jashtë vendit, që rezulton se ka bërë pagesa selektive. Llogaritë e kompanisë në Tiranë, janë boshatisur dhe rezultojnë me humbje.
Kjo kompani deklaron vetëm humbje dhe nuk ka paguar taksat. Por rezulton sipas të dhënave, që një bankë e nivelit të dytë, është dërguar letër-porosi në Austri, kjo bankë ka bërë pagesa selektive dhe çelësi i kësaj çështje, nëse do të merren pagesa që ka kryer, të shihen zyrtarët, kompanitë, ish ministrat, kompanitë e PR, lobimit e me radhë, gjithë afera Bankers mund të zbardhet.
Për momenti nuk ka ndonjë zhvillim, por prokurorit duhet të kthejnë sytë te kjo bankë e nivelit të dytë. Kështu kuptohet se çfarë ka ndodhur me aferën Bankes dhe sa miliona janë vjedhur. Janë minimalisht 5-6 ministra apo ish ministra të përfshirë.
Që nga kompani, ose studio avokatore, kupton që janë në nivel të larta dhe pagesa shumë të larta.
Një letër porosi, më rezulton se është nisur drejt Austrisë dhe pritet të kuptohet se në favor të kujt janë nisur pagesat. Aty bëhet fjalë për pastrim parash në nivel marramendëse. Kompani offshore janë të vështira për të pasur informacion.
Anita Jella dhe Enkelejda Millonai, dy prokuroret e SPAK, kanë dërguar një sërë letër-porosi dhe këtu është përqendruar për momentin hetimi”, tha Lala.
Të ngresh supet dhe të bësh si i habitur kur ju ke dhënë pushtet kësaj kategorie nuk është justifikim.
Ky është një shkrim i imi për frymorët e Gjykatës Kushtetuese në vitin 2024.
Prandaj sot, pas pilafit, mos hani kot m…, se ju vjen era hale për çdo fjalë që nxirrni nga goja, kur ju intereson apo keni hallin tuaj.
Mirë është të flasësh në kohë dhe parimisht për çdo fenomen apo institucion dhe për çdo qelbësirë të institucionit që nuk meriton të jetë në institucionet më të larta të Shtetit.
Ky është shkrimi në maj 2024.
Po shihja me vëmendje kush janë 9 anëtarët e Gjykatës Kushtetuese për të kuptuar çfarë janë, nga vijnë, çfarë përfaqësojnë, kush është karriera e tyre, kush parti politike i ka mbështetur dhe promovuar ndër vite dhe gjatë cilës kohë kanë përfituar përkrahje dhe privilegje.
Nisur nga mosha e tyre, shoh që vetëm 3 nga 9 anëtarë kanë filluar fakultetin në kohën e komunizmit dhe duke parë moshën, vetëm për këta të tre mund të ngre pyetjen a kanë qenë apo jo ish-spiunë të Sigurimit.
1- Marjana Semini e datëlindjes 1966
2- Gent Ibrahimi i datëlindjes 1970
3- Ilir Toska i datëlindjes 1970
Pra, teorikisht kush ka qenë 18 vjeç deri në dhjetor të vitit 1990, ka pasur mundësinë të ishte edhe spiun sigurimi.
Të 6 anëtarët e tjerë janë të datëlindjeve 1974, 1975, 1976.
Përveç znj. Marjana Semini, që ka mbaruar fakultetin në vitin 1988, pra në kohën e komunizmit, të 8 anëtarët e tjerë kanë mbaruar pas vitit 1992.
Kur i sheh se ku kanë punuar dhe si janë promovuar, shikon që 6 prej tyre janë promovuar, përkrahur, emëruar dhe graduar gjatë qeverisjes së PD.
1- Znj. Semini është emëruar 4 vjet, 2009–2013, drejtoreshë e Shkollës së Magjistraturës, shkollë ku përgatiten gjyqtarët dhe prokurorët magjistratë.
Pra, edhe pse gjenetikisht vjen nga familja Tutulani ekstra e majtë, për çudi është graduar nga pushteti i PD.
2- Znj. Xhaferllari ka qenë këshilltare e ministrave të Drejtësisë pas ardhjes së PD në pushtet nga 2005 e në vazhdim dhe është emëruar nga Presidenti Meta duke ardhur si propozim antikushtetues i Dvoranit të KED-it, ku nga 3 kandidatë që duhet të dërgonte, ai dërgoi 4 dhe Presidenti dekretoi të katërtën.
3- Z. Ilir Toska, nga gjyqtar në Librazhd, është emëruar në Gjykatën e Apelit Tiranë gjatë qeverisjes së PD.
4- Z. Sandër Beci është emëruar pedagog në Universitetin e Shkodrës qysh në vitin 1996, sapo ka mbaruar fakultetin aty dhe ka punuar deri në vitin 2018, kur u zgjodh anëtar i KLD.
5- Znj. Sonila Bejtja është emëruar nga Presidenti Meta nga profesioni i noteres, sepse është bashkëshortja e gazetarit Andi Bejtja dhe besoj që ka pasur jo pak avantazh nga ky fakt.
6- Znj. Elda Toska, prej vitit 2007, ka qenë këshilltare ligjore në Gjykatën Kushtetuese dhe para kësaj kohe, nga viti 2000–2006, ka punuar tek Avokati i Popullit, meqë në atë kohë Avokat i Popullit ishte z. Ermir Dobjani nga Kavaja dhe zj. Elda ka lindur në Kavajë dhe është vajza e vëllait të Ermir Dobjanit.
7- Znj. Fiona Papajorgji është emëruar në Drejtorinë e Studimeve dhe Botimeve të Gjykatës Kushtetuese në vitin 2009 dhe më pas, deri në vitin 2019, ka qenë këshilltare ligjore në Gjykatën Kushtetuese.
8- Z. Gent Ibrahimi ka qenë këshilltar kryesor i reformës në drejtësi, që sipas Kushtetutës nuk duhej të përfshihej fare në asnjë institucion të drejtësisë së re, sepse ishte hapur në konflikt interesi, por jo vetëm z. Ibrahimi, por edhe të tjerë që hartuan reformën sot janë në majat e kësaj drejtësie. Genti ka qenë edhe shef i kabinetit të z. Imami kur ishte ministër Drejtësie dhe bashkëhartues i Kushtetutës së vitit 1998.
9- Znj. Holta Zaçaj, që është edhe kryetare e kësaj Gjykate, ka punuar si këshilltare në Bashkinë e Tiranës, kur kryetar i kësaj bashkie ka qenë z. Rama, por nga viti 2003–2013 ka qenë e emëruar si pedagoge në Shkollën e Magjistraturës.
Nuk po ju bëj biografinë dhe as po merrem me CV-të e tyre, por kur i shoh që nga 9 anëtarë vetëm njëri prej tyre, z. Gent Ibrahimi, nuk ka pasur lidhje dhe nuk është emëruar, promovuar, përkrahur apo graduar nën qeverisjen e PD, atëherë pyes veten pse janë kaq me mllef apo kundër çdo kërkese që paraqitet pranë kësaj Gjykate nga deputetë të PD apo vetë PD.
Pse gjatë 13 viteve në pushtet PD kishte shumë qejf dhe afeksion për të graduar, emëruar, promovuar, shpërblyer individë të tillë?
Kushdo ka të drejtë t’i quajë bukëshkelës, mosmirënjohës, besëprerë, tradhtarë, të shitur apo të blerë, por vetë kupola drejtuese e PD, që ka qeverisur gjatë pushtetit të saj, a nuk ka asnjë përgjegjësi që zgjidhte vetëm nga kjo kategori?
Të ngresh supet dhe të bësh si i habitur kur ju ke dhënë pushtet kësaj kategorie nuk është justifikim.
Për ta mbyllur, se e di që do më mërziten shumë disa miq FB “parimorë” dhe/apo militantë debilë e skllevër të tredhur nga trutë e kokës nga çdo krah politik, po tregoj një proverb gjysmë barsaletë:
Një ditë filluan drurët e pyllit të ulërinin dhe të ankoheshin se po i priste sëpata, dhe përgjigjen e morën nga oshëtima e maleve duke u thënë:
Mos u ankoni se bishtin vetë ia keni vënë sëpatës, se pa bisht sëpata nuk ju pret dot kurrë.
Tani mezi po pres të më bëjnë moral të gjithë “moralistët” parimorë dhe me këtë rast, t’i fshij nga FB, sepse nuk kam nevojë për miq që quajnë të mirë çdo gjë që del nga goja e liderit dhe duan, shajnë, urrejnë apo mburrin sipas shijes së liderit.
Xhafaj i përgjigjet Klodian Brahos: Kuvendi ka të drejtë të kontrollojë
Fatmir Xhafaj zgjodhi të presë disa ditë përpara se t’i përgjigjej publikisht refuzimit të SPAK për ta pritur në një vizitë të ashtuquajtur “monitoruese”.
Sot, nga salla e komisionit parlamentar që ai drejton, ish-ministri i Brendshëm foli gjatë për kompetencat e Kuvendit, për dialog institucional dhe për praktika parlamentare, duke tentuar të shfaqë forcë politike përballë një institucioni që po heton edhe deputetë të mazhorancës.
Edhe pse pa e përmendur drejtpërdrejt emrin e drejtuesit të Prokurorisë së Posaçme, mesazhi ishte i qartë dhe i drejtuar për Klodian Brahon. Xhafaj u përpoq të relativizojë refuzimin e SPAK, duke argumentuar se mbikëqyrja parlamentare nuk përbën ndërhyrje dhe se vizitat monitoruese janë “praktikë e konsoliduar”.
“Normat dhe praktikat parlamentare nuk e shohin kurrsesi funksionin kushtetues të mbikëqyrjes parlamentare si monitorim të institucioneve të pavarura dhe sidomos ndaj veprimtarisë së tyre, dhe ndaj nuk kanë aspak karakter ndërhyrës të çdo natyre qofshin ato. Vizitat monitoruese janë një praktikë e konsoliduar parlamentare edhe në legjislaturën e kaluar”, u shpreh Xhafaj në mbledhjen e komisionit për Nismat Qytetare, Bashkëpunimin dhe Mbikëqyrjen Institucionale.
Por pikërisht këtu qëndron paradoksi dhe shqetësimi. SPAK është një institucion i pavarur kushtetues, i ngritur për të hetuar korrupsionin e nivelit të lartë dhe krimin e organizuar, përfshirë politikanë dhe deputetë. Në këtë kontekst, insistimi i një komisioni parlamentar për “vizita monitoruese” ngre dyshime për kufijtë realë mes bashkëpunimit institucional dhe presionit politik.
Xhafaj këmbënguli se komisioni që ai drejton e ka të sanksionuar në ligj kontrollin parlamentar dhe se ky kontroll, sipas tij, shërben për bashkëpunim e jo për ndërhyrje.
“Shqipëria është republikë parlamentare. Kuvendi, në ushtrimin e kompetencave të tij kushtetuese, shërben edhe si hapësirë e dialogut institucional”, deklaroi ai.
Por faktet flasin për një përplasje konkrete. Pikërisht ditën kur Klodian Braho mori detyrën e kryeprokurorit të SPAK, komisioni i drejtuar nga Xhafaj kërkoi të përfshihej në axhendën e Prokurorisë së Posaçme. Kërkesa kishte të bënte me një vizitë monitoruese mbi rezultatet e SPAK në luftën kundër pastrimit të parave, e mbështetur, sipas shkresës, edhe në një kërkesë të Agjencisë së Inteligjencës Financiare.
SPAK iu përgjigj prerë “jo” këtij takimi, i sugjeruar për datën 6 shkurt 2026, duke e cilësuar vizitën monitoruese si tejkalim të ligjit dhe cenim të pavarësisë së institucionit.
“Çdo praktikë për të kryer vizita të tilla monitoruese do të binte ndesh me pavarësinë kushtetuese të Prokurorisë së Posaçme”, thuhet në shkresën zyrtare të SPAK, ku theksohet se pavarësia nuk është thjesht formale, por kusht themelor për hetime të paanshme dhe efektive.
Megjithatë, SPAK la të hapur derën për bashkëpunim ligjor, duke sqaruar se mund të informojë komisionin sipas parashikimeve ligjore, por jo të pranojë monitorim.
Përplasja Xhafaj–SPAK nxjerr në pah një tension të vjetër mes politikës dhe drejtësisë së re: ndërsa SPAK pretendon pavarësi reale dhe refuzon çdo formë monitorimi politik, një pjesë e klasës politike vijon të kërkojë hapësira kontrolli, edhe kur bëhet fjalë për institucione që po hetojnë vetë politikën.
Pas publikimit të dokumenteve nga dosja e pedofilit, Epstein, në shumë vende të botës, standardi moral dhe institucional tregoi se pushteti nuk është imunitet.
Dhjetëra zyrtarë të lartë dhe politikanë dhanë dorëheqjen apo janë larguar nga postet, jo sepse janë dënuar penalisht, por sepse është provuar ose dyshuar se kanë pasur kontakte, biseda apo marrëdhënie me Epstein.
Mes tyre Lajçak, një i turpëruar moral me biseda banale me pedofilin, dha dorëheqjen nga posti i këshilltarit të kryeministrit sllovak. Po ashtu Lord Mandelson. Në telashe gjendet edhe princesha novegjeze e shumë njerëz të rëndësishëm në skenën botërore. Klintonët po shkojnë të japin shpjegime në Kongres, Trump është nën ethe permanente se mos i del ndonjë gjë e padëshiruar edhe atij.
Në shumë raste, bëhet fjalë vetëm për takime, email-e apo njohje shoqërore — megjithatë, përlyerja morale ka mjaftuar për secilin.
Pra, në demokraci normale, besimi publik është kapital, ai humbet jo vetëm kur shkel ligjin, por edhe kur komprometon etikën.
Në Shqipëri, jo vetëm të turpëruarit moralë, por as hajdutët nuk çajnë kokë për gjë.
Numri 1 dhe 2 të ekzekutivit shqiptar, shyqyr te Epsteini nuk kanë dalë deri tani, po dosjet dhe dyshimet penale u janë bërë kavaletë. Nuk përballen me akuza abstrakte, por fakte dhe dyshime serioze për krime penale, për kapje institucionesh, për përdorim të pushtetit e, mbi të gjitha, po dëshmojnë përditë se sistemin e drejtësisë e kanë një plastelinë në duart e tyre. Një sistem që bërtisnin se ishte i pavarur, sot e kanë ekspozuar publikisht si plastelinë që luajnë fëmijët me të.
Në Perëndim mjafton një njollë morale për të dhënë dorëheqjen, këtu krimi penal trajtohet si normalitet. Dhe një drejtësi që sillet si struc përballë arrogancës së subjekteve të saj.
Prej muajsh tashmë GJK ka futur kokën brenda ca sallave të akullta dhe nuk guxon të flasë. E parlamentit s’i plas fare për SPAK-un që kërkon arrestimin e numrit 2.
A kemi ne një parlament dhe drejtësi me idiotë? Jo. Ata thjeshtë janë njëjtë si shokët e Epstein, të kapur, të inçizuar dhe të shantazhuar sipas rastit.
Këta as sa Lajçak i turpëruar nuk kanë moral.
