Gazetari dhe Drejtori i Përgjithshëm i “ABC News”, Sokol Balla, është paraqitur këtë të martë në ambientet e Prokurorisë së Posaçme kundër Korrupsionit dhe Krimit të Organizuar, SPAK.
Burime pranë organit të akuzës bëjnë me dije se Balla është thirrur për të dhënë shpjegime në kuadër të hetimeve që lidhen me ish-bashkëshorten e tij, Belinda Balluku. Ai është marrë në pyetje nga prokurori Dritan Prençi, në cilësinë e personit që ka dijeni për rrethana të caktuara që po verifikohen nga hetuesit.
Seanca e marrjes në pyetje ka zgjatur mbi një orë. Pas daljes nga godina e SPAK, Balla nuk ka pranuar të japë asnjë deklaratë për mediat, duke u larguar në heshtje.
Sokol Balla dhe Belinda Balluku kanë qenë më parë të martuar. Edhe pse martesa e tyre ka përfunduar me divorc, raportet mes tyre kanë mbetur në vëmendje për shkak të zhvillimeve të fundit hetimore. Më heret Publik Media kishte raportuar se gazetari Balla kishte blere një shtepi me vlere 500 mijë euro në kullën e madhe “Downtown One”.
Sipas informacioneve që po qarkullojnë në kuadër të këtij hetimi, po verifikohen edhe dyshime mbi përfitime të mundshme pasurore, që pretendohet se mund të jenë lidhur me marrëdhënie me biznesmenë në Tiranë, të cilët kanë fituar tendera publikë gjatë periudhës kur Balluku ushtronte funksione ekzekutive. Hetimet vijojnë dhe pritet që organi i akuzës të dalë me një qëndrim zyrtar pasi të përmbyllen verifikimet.
