Shtëpia e Bardhë ka publikuar tarifat më të larta të shpallura kundër partnerëve tregtarë të SHBA-së nga Presidenti Trump.
Siria kryeson listën me një normë të re tarife prej 41%, një shifër e jashtëzakonshme për një vend që ende po përpiqet të rikuperohet nga një luftë civile 14-vjeçare që sapo ka përfunduar.
Laosi dhe Myanmari vijnë më pas në listë, secili me tarifa prej 40%. Ekspertët kishin paralajmëruar më parë se tarifat e reja të Trump pritej të godisnin veçanërisht rëndë ekonomitë aziatike.
Zvicra është renditur me një tarifë prej 39%. Siç kemi raportuar më parë, është i vetmi vend që zhvillon tregti të konsiderueshme me SHBA-në dhe që përballet me një nivel kaq të lartë tarife.
Iraku dhe Serbia do të përballen secili me një tarifë prej 35%.
Katër vende të tjera do të goditen me tarifa prej 30%: Algjeria, Bosnje-Hercegovina, Libia dhe Afrika e Jugut.
Tarifat e rishikuara pritet të hyjnë në fuqi brenda shtatë ditësh, në orën 12:01 të mëngjesit sipas kohës së Uashingtonit më 7 gusht, jo sot, 1 gusht, siç ishte planifikuar më parë, sipas një zyrtari qeveritar.
Shkalla minimale e tarifës për importet nga shumica e vendeve që nuk janë listuar më poshtë është vendosur në 10%. Mallrat që gjenden të jenë transborduar për të shmangur tarifat më të larta do t’i nënshtrohen tarifave shtesë.
Ato vende që nënshkruan marrëveshje tregtare para afatit i nënshtrohen tarifave të shpallura. Kështu, produktet e Bashkimit Evropian, Japonisë, Koresë së Jugut do të tatohen me 15%, Britania me 10%. Disa ekonomi, të tilla si Kina, Kanadaja dhe Meksika, ndjekin rrugë të ndryshme tregtare dhe mbulohen nga dispozita të ndryshme.
