Ish-Kryebashkiaku i pezulluar i Tiranës, Erion Veliaj, ka folur sot në seancën e Gjykatës Kushtetuese (GJK), duke dhënë një deklaratë të fortë emocionale dhe politike lidhur me ankimimin e tij kundër shkarkimit nga detyra.
Veliaj e vendosi çështjen në kontekstin e mbrojtjes së demokracisë dhe besimit të qytetarëve:
“Nuk ka asgjë më fisnike sot sesa të mbroj besimin. Jam këtu për të mbrojtur betimin tim si kryetar i Bashkisë së Tiranës. Këtë betim do ta mbroj edhe sot, para jush.”
Akuzat Për Tradhti Morale
Duke cituar një fragment nga betimi i tij, Veliaj sugjeroi se përdorimi i ligjit për të dëmtuar vullnetin e votuesve përbën një rrezik serioz për shtetin:
“Nëse ligji do të përdoret për të vënë në pikëpyetje demokracinë apo jo. Kur pushteti që buron nga vota devijohet, kjo kthehet në tradhti morale. Dhe atëherë, sipas meje, Republika nuk rrezikohet nga asnjë armik i jashtëm, por nga brenda.”
Fyerja Më E Rëndë
Veliaj iu referua drejtpërdrejt argumentit kryesor të Qeverisë për shkarkimin e tij – mungesa prej tre muajsh në detyrë – duke e cilësuar atë si ofendimin më të rëndë që i ka ardhur nga brenda radhëve të Partisë Socialiste:
“Më thanë se s’kam qenë në detyrë. Edhe kjo ishte fyerja më e rëndë në jetën time. Është fyerja më e rëndë që më ka ardhur nga bashkëpunëtorët e mi. Lutem çdo ditë për ta dhe them: ‘Fali, sepse nuk e dinë ç’kanë bërë.’”
Me këtë deklaratë, Veliaj e zhvendosi fokusin e çështjes nga një mosmarrëveshje ligjore në GJK në një konflikt të thellë moral dhe politik brenda mazhorancës.
