Kreu i PD-së Berisha hodhi dyshime mbi hakerimin që ka ndodhur në SPAK tre javë më parë.
Në bashkëbisedimin me gazetarët ai tha se mund të jetë edhe vetëhakerim, si pjesë e një lufte të brendshme mes klaneve mafioze në PS. Berisha theksoi se atë që ka ndodhur duan t’ia faturojnë Fatmir Xhafajt.
“A është hakerim apo vetëhakerim, nuk e di. Të dhënat po merren dhe manipulohen. Mund të kemi një luftë të brendshme mes klaneve mafioze të PS. Po e përdorin këtë situatë për të sulmuar njëri-tjetrin. Po duan t’ia faturojnë Fatmir Xhafës. Nuk e dimë nëse këto të dhëna janë hakeruar apo vetëhakeruar, por po shfrytëzohen për qëllime të caktuara. U kthye koha kur dosjet para se të shkonin në gjykatë shkonin në PS. Para shumë vitesh, dosja para se të shkonte në gjykate, shkonte në PS. Tani hakerohet. A është hakerim apo vetëhakerim, nuk e di. Të dhënat po merren e manipulohen. Mund të ketë një luftë të brendshme mes klaneve mafioze të PS. Grupi armiqësor, Xhafa, pastori, Bushka, dy tre të tjerë. Më shëmbëllen si historia e statuseve të Erion Veliajt, statuset i shkruante Rama dhe përgjigjen ja jepte SPAK Veliajt. Këtë hakerimin duan t’ia faturojnë Fatmir Xhafës. Ato janë hakeruar apo vetëhakeruar nuk e marrim vesh. Por kjo po përdoret. Fatmirit po i vijnë rrotull dhe po e akuzojnë se ka hakeruar”, tha ai.
Pasi lajmi doli në media, SPAK bëri një njofrim zyrtar sot duke thënë se ndërhyrja ishte bërë në emailet e prokurorëve të SPAK-ut, ku janë marrë informacione po jo sekrete nga dosjet hetimore.
Po kështu SPAK garantoi se asnjë informacion i rëndësishëm hetimor nuk është marrë ndërsa për hakerimin janë arrestuar deri tani dy persona.
Në pranga kanë rënë Zambak Gjoni, ish-drejtor i paraburgimit Vlorë dhe Arnold Rrokaj, ish-punonjës i IMT, të cilët dyshohen për ndërhyrjen. Disa nga këto materiale kanë përfunduar në celularin e ish-kreut të burgjeve, Agim Ismaili, si dhe te Dritan Palnikaj, aktualisht sekretar në Ministrinë e Arsimit.
Palnikaj u pyet disa ditë më parë nga SPAK, ndërsa telefoni i tij u kontrollua nga hetuesit. Ndër materialet e vjedhura nga email-et e prokurorëve ndodhen edhe ato që lidhen me zyrtarë të hetuar, çështjen e inceneratorëve dhe krimin e organizuar.
