Lei Jun, bashkëthemeluesi miliarder i prodhuesit kinez të telefonave inteligjentë ‘Xiaomi’, bëri një dhurim bujar për universitetin e tij, Universitetin Wuhan, duke shtuar një rritje të dhurimeve nga më të pasurit e vendit.
Lei i dhuroi shkollës 1.3 miliardë juanë (182 milionë dollarë), dhurimi më i madh ndonjëherë në para për një universitet kinez nga një student, sipas llogarisë zyrtare të institucionit në Weibo. Paratë do ndihmojnë në mbështetjen e shpikjeve të shkencës kompjuterike, zhvillimin e studentëve dhe kërkimin në gjashtë disiplina themelore, thuhet në një postim të veçantë.
Dhurimet nga kinezët e pasur janë rritur në vitet e fundit ndërsa presidenti Xi Jinping po përpiqet të mbyllë hendekun e pasurisë me fushatën e tij të “përparimit të përbashkët”. Në korrik 2021, Lei transferoi 2.2 miliardë dollarë aksione të ‘Xiaomi’ te ‘Fondacioni Xiaomi’ dhe ‘Fondacioni Lei Jun’.
Lei, 53 vjeç, u diplomua nga Universiteti Wuhan në 1991 me një diplomë bachelor në shkenca kompjuterike përpara se të fillonte karrierën e tij teknologjike. Ai gjeti një punë në prodhuesin kinez të programeve ‘Kingsoft’ dhe në vitin 1998 ishte shefi ekzekutiv i saj. Më pas ai bashkëthemeloi një kompani të shitjes me pakicë në internet që ia shiti ‘Amazon’-it në 2004. ‘Xiaomi’ filloi në 2010.
Lei tani ka një vlerë prej 14.3 miliardë dollarësh, bazuar në aksionet e tij në firmat e teknologjisë duke përfshirë ‘Xiaomi’ dhe ‘Kingsoft’, sipas Indeksit të Miliarderëve të Bloomberg.
Javën e kaluar, ‘Xiaomi’ raportoi fitimin e saj të parë të të ardhurave në pothuajse dy vjet pasi u zgjerua në mënyrë agresive në telefonat e nivelit më të lartë brenda dhe jashtë vendit.
Xiaomi nuk iu përgjigj menjëherë një kërkese për koment.
