Presidenti amerikan, Donald Trump, ka reaguar për sulmet në Venezuelë duke thënë se janë kryer nga SHBA, ndërsa thekson se “është kapur Maduro dhe bashkëshortja e tij, dhe janë nxjerrë jashtë vendit”.
Ai konfirmoi pretendimet e mediave ndërkombëtare se Shtetet e Bashkuara të Amerikës ishin përgjegjëse për sulmin dhe bëri me dije se presidenti i Venezuelës, Nicolás Maduro, dhe bashkëshortja e tij janë kapur nga forcat amerikane dhe janë nxjerrë jashtë vendit.
Ndërkohë Rusia dhe Irani dënojnë sulmet e së shtunës ndaj Venezuelës, pasi Karakasi akuzoi Shtetet e Bashkuara se qëndronin pas shpërthimeve që tronditën kryeqytetin.
Sipas Agjencisë Franceze të Shtypit (AFP), ministria e jashtme iraniane në një deklaratë tha se “dënon fuqimisht sulmin ushtarak amerikan ndaj Venezuelës dhe shkeljen flagrante të sovranitetit kombëtar dhe integritetit territorial të vendit”.
Deklarata e Iranit u publikua përpara postimit të Donald Trump në Truth Social, i cili konfirmonte se SHBA-të kishin kryer “një sulm në shkallë të gjerë” ndaj Venezuelës.
Në postimin e tij, Trump shkruan se aksioni ishte i suksesshëm.
“Shtetet e Bashkuara të Amerikës kanë kryer me sukses një sulm në shkallë të gjerë kundër Venezuelës dhe udhëheqësit të saj, presidentit Nicolás Maduro, i cili, së bashku me bashkëshorten e tij, është kapur dhe është nxjerrë jashtë vendit. Ky operacion u krye në bashkëpunim me forcat e rendit të SHBA-së. Detaje të tjera do të pasojnë. Sot, në orën 11:00, do të mbahet një konferencë për shtyp në Mar-a-Lago. Faleminderit për vëmendjen ndaj kësaj çështjeje!”, shkruan Trump.
Ky reagim i Trump, i parë si një konfirmim i drejtpërdrejtë i operacionit, vjen në një moment shumë të tensionuar në rajon, ndërsa kriza politike dhe tensionet ushtarake në Venezuelë janë shtuar ndjeshëm.
Postimi i presidentit amerikan thekson se operacioni u krye në bashkëpunim me forcat e rendit të SHBA-ve dhe sinjalizon se Shtetet e Bashkuara po marrin një rol aktiv në zhvillimet e fundit në vendin e Amerikës Latine.
Në pritje të konferencës së planifikuar për shtyp në Mar-a-Lago, komuniteti ndërkombëtar po monitoron me vëmendje situatën, ndërsa lajmet mbi kapjen dhe nxjerrjen e Maduro dhe bashkëshortes së tij jashtë Venezuelës ngrenë pyetje të mëdha për të ardhmen politike dhe stabilitetin në vend.
