Një gjykatë në Paris e ka shpallur ish-presidentin francez Nicolas Sarkozy fajtor për “komplot kriminal”, por e ka liruar nga akuzat për korrupsion pasiv dhe përvetësim në financimin e dyshuar libian nga regjimi i Muammar Gaddafit, të fushatës së tij presidenciale të vitit 2007.
Kryetarja e trupit gjykues, Nathalie Gavarino, shpjegoi se ai ishte fajtor për konspiracion kriminal sepse i kishte lejuar bashkëpunëtorët e tij të ngushtë të vepronin me qëllim marrjen e mbështetjes financiare nga regjimi libian.
Claude Gueant, ish-menaxheri i fushatës së Nicolas Sarkozy, është shpallur fajtor për konspiracion kriminal, korrupsion pasiv, ushtrim të ndikimit pasiv, falsifikim dhe përdorim të falsifikimit, si dhe pastrim parash të rënduar në rastin e dyshimeve për financim nga Libia.
Ish-ministri i Brendshëm Brice Hortefeux u shpall fajtor për komplot kriminal.
Ai u ndoq gjithashtu penalisht për bashkëpunim në financimin e paligjshëm të fushatës.
Sarkozy 70 vjeç është ende në pritje të dënimit, por pritet të jetë në gjendje të largohet nga gjykata i lirë duke apeluar vendimin, gjë që do ta shtynte dënimin deri pas apelit.
Sarkozi ka deklaruar vazhdimisht pafajësinë e tij dhe ka pretenduar se është viktimë e një fushate shpifjeje të koordinuar nga aleatët e Gadafit, pasi ish-presidenti francez udhëhoqi përpjekjet e NATO-s për të rrëzuar diktatorin libian në vitin 2011.
Sarkozy konservator ka pasur përplasje të përsëritura me ligjin që kur u largua nga detyra – përfshirë një rast korrupsioni në të cilin ai u shpall fajtor dhe i ka shteruar të gjitha të drejtat e apelit. Por çështja libiane përmbante akuzat më të rënda dhe dënimet më të rënda të mundshme.
Kjo nuk është përballja e parë e Sarkozy-së me drejtësinë. Ai është dënuar më parë për korrupsion dhe për financim të paligjshëm të fushatës në çështjen e njohur si “afera Bygmalion”. Përveç pasojave ligjore, dënimet i kanë kushtuar edhe humbjen e dekoratës së Legjionit të Nderit.
Megjithatë, ish-presidenti mbetet një figurë me ndikim në të djathtën franceze dhe vijon të ketë kontakte të rregullta me presidentin aktual Emmanuel Macron, duke ruajtur një profil aktiv në politikën franceze.
Rregullat e çmimit të Legjionit të Nderit nënkuptonin se revokimi ishte i pritshëm.
