Gazetarja Klodiana Lala përmes një deklaratë ka denoncuar hetimet e DEA-s amerikane në Shqipëri dhe për çështjen e Arbër Çekajt me 613 kilogramët e kokainës në banana.
Në një intervistë me Adi Krastën, Lala përmendi ndërprerjen e operacionit nga prokuroria. Sipas saj, operacioni u ndërpre për të fshehur bosët e vërtetë të trafikut.“Kemi rastin e Arbër Çekajt, prokuroria mori kritika të forta pse e ndërpreu operacionin. Prokurorët thanë se ra mbrëmja dhe droga mund të zhdukej. Në fakt nuk ishte justifikim. Ai operacion u ndërpre për të fshehur bosët e vërtetë të trafikut. Arbër Çekaj nuk ishte i vetmi, kishte të tjerë të përfshirë. Kjo ndodhi edhe në Xibrakë, njerëz të rëndësishëm të përfshirë aty dhe autoritetet e dekonspiruan. Dhe amerikanët e kanë kuptuar më në fund që duhet të kenë zëra të pavarur dhe burime të pavarura për të shkuar te e vërteta”, deklaroi gazetarja.
Kujtojmë se Çekaj është i dënuar për trafikimin e 613 kilogramëve kokainë nga Kolumbia në Durrës që u sekuestruan në magazinat e Arbri Garden.
Në 2020-ën, GJKKO e dënoi me 21 vite burg, por ai do të vuajë 14 vite heqje lirie për shkak të gjykimit të shkurtuar.
