Matteo Mesina Denaro, i konsideruar si bosi më i madh i mafias italiane prej 30 vitesh në arrati, u arrestua ditën e djeshme, por shumë italianë pyesin: pse pikërisht tani?
Si ka mundësi që bosi i Cosa Nostra, i akuzuar për dhjetra krime makabre jetoi për 30 vite në zemër të Italisë duke mos lënë asnjë gjurmë te autoritetet? Mediat italiane kanë zbuluar detaje të reja nga jeta e “Diabolikut”, një prej njerëzve më të besuar të Salvatore Riina-s.
Andrea Bonafede, ky ishte identiteti i vjedhur i Matteo Mesina Denaro, kartën e identitetit me këtë emër ai e kishte harruar në një sirtar kohët e fundit, çka çoi edhe në gjurmimin e tij.
Por mesa duket vitet e fundit, Denaro ka qenë më i shkujdesur. Teksa u diagnostikua me kancer në prostatë ai nisi kurimin në një klinikë private. Aty takohej me pacientë të tjerë, bisedonte me ta, madje bënte edhe “selfie” me doktorët.
Jeta e tij ishte kufizuar brenda trekëndëshit Selinunte, Campobello di Mazara dhe Tre Fontane. Ai preferonte të kalonte pushimet në këto zona, pëlqente femrat dhe video-lojërat. Denaro mund të kalonte orë të tëra duke luajtur me një PlayStation të lidhur me internetin.
Kjo jetë e shkujdesur e Denaros, i cili madje së fundmi kishte shkëmbyer numrin e telefonit me disa pacientë me të cilët kurohej në klinikë, kanë bërë italianët të mendojnë se ai thjesht ishte i lodhur nga jeta në arrati.
Kanceri nuk ishte sëmundja e tij e parë e rëndë. Ai ishte pajisur me një aparat dialize portativ. Një pajisje shumë e shtrenjtë dhe që rrallë herë ndodh që të blihet nga një person. Këtë pajisje të fjalës së fundit të teknologjisë e prodhojnë vetëm 2 kompani në të gjithë botën.
Sigurisht arrestimit i tij është një arritje e madhe për ligjzbatuesit italianë, policinë dhe prokurorinë. Megjithatë duket se shumë pyetje do të mbeten pa përgjigje.
