Në Shqipëri, kur flitet për kapjen e shtetit, nuk bëhet fjalë më për teori politike, por për raste konkrete, me emra, mbiemra dhe funksione zyrtare. Një prej tyre lidhet drejtpërdrejt me AKSHI-n, institucionin që kontrollon trurin digjital të shtetit shqiptar.
Një fakt domethënës, që nuk mund të anashkalohet: drejtoreshë juridike e AKSHI-t është Vila Agasi, motra e Ergys Agasit. I njëjti Ergys Agasi që është përmendur dhe akuzuar për përfshirje në grup të strukturuar kriminal dhe për lidhje të rënda me aktivitete kriminale.
Në një vend normal, ky fakt do të mjaftonte për të ngritur menjëherë alarmin institucional. Në Shqipëri, duket se shërben si garanci.
Sepse çfarë përfaqëson drejtoria juridike e AKSHI-t?
– Kontroll mbi procedurat e tenderëve
– Interpretim ligjor të kontratave milionëshe
– Mbrojtje juridike të vendimmarrjeve të dyshimta
– “Vulosje” ligjore të çdo procesi problematik
Pra, post kyç, jo dekorativ.
Vendosja e motrës në këtë funksion nuk duket rastësi, por masë sigurie. Siguri që çdo procedurë, çdo kontratë dhe çdo vendim të kalojë përmes një filtri familjar. Një skemë e njohur në logjikën e kapjes së institucioneve: pushteti real mbahet përmes lidhjeve të gjakut, jo përmes meritokracisë.
AKSHI ka qenë vazhdimisht në qendër të skandaleve me tendera teknologjikë, sisteme të dështuara, kontrata të dyshimta dhe kompani klienteliste. Në këtë kontekst, prania e një familjari të drejtpërdrejtë të një personi me profil kriminal në zemër të strukturës juridike është alarm kombëtar, jo thjesht lajm.
Kjo nuk është më çështje morale. Është çështje sigurie shtetërore, besimi publik dhe funksionimi i ligjit.
Pyetjet janë të qarta:
Kush e emëroi Vila Agasin?
A është verifikuar lidhja familjare?
Në një shtet që pretendon integrim europian, këto pyetje nuk janë luks, por detyrim.
Publiku meriton përgjigje. Dhe heshtja, në këtë rast, është vetë përgjigjja më e rëndë.
