Hetuesit e Prokurorisë së Posaçme kanë marrë në pyetje edhe arkitektët e vilës në Palasë, që dyshohet se i përket ish-zv.kryeministrit Arben Ahmetaj, e përfituar në mënyrë të paligjshme, e sekuestruar tashmë nga SPAK.
Në dëshmitë e zbardhura nga emisioni “Review”, arkitektët tregojnë takimet që kanë patur me shtetasen Albina Maçka, ish-bashkëshortja e Arben Ahmetajt, për aredimin e vilës në Palasë.
Dëshmitë:
Mbaj mend që kam bërë një projekt interior design për Albina Mancka për një vilë të ndodhur në Palase, rreshti i tretë ose i katërt. Më duket se ka qene viti 2019 kur me ka kontaktuar Albina për këtë projekt. …Albina për projektin që i përgatita, më ka kontaktuar vetë dhe më ka paguar një vlerë rreth 2500 ose 3000 (tre mijë) euro, nuk më kujtohet saktësisht.
Nuk e mbaj mend se ku kam qenë i punësuar në kohën që kam përgatitur projektin. Mesa me kujtohet, vila për të cilën do të përgatisja projekt idene, cilësohej si vilë e vogël , ndoshta 170 deri në 180 m2, në filet digitale që më janë vënë në dispozicion nga shoqëria “X” të cilat mi dërgoi me email. Unë kam vajtur fizikisht në Dhërmi, e kam parë vilën, kam qenë vetëm.
Vilën e gjeta pasi kam patur në dokumentat që më janë vënë në dispozicion nga shoqëria “X” një hartë treguese. Vila nuk ka patur nevojë për celësa sepse ka qenë karabina, në ndërtim e sipër. Shoqëria “X” më ka dërguar në autocad projektin e zbatimit të vilës, por unë kam shkuar përsëri për të verifikuar punën tonë, duke bërë prapë matje fizikisht. Unë projektin e kam bërë bashkë me pjesëtarë e tjerë të zyrës të cilët, në fakt, janë shumë, rreth 15 vetë.
Arkitektja ka deklaruar se: Ne kemi bërë si zyrë një project interior për një vilë të Albinës në Palasë, me sa më kujtohet kemi filluar punimet rreth vitit 2020. Kontaktet në fillim, porositë bëheshin tek “ARKITEKTI” dhe më pas e ndiqja unë në varësi të rastit apo projektit. Kam shkuar në Palasë dhe e kam parë vilën. Vila mban numrin 74, dhe ndodhet në Palasë, është vilë 2-katëshe ku poshtë është salloni dhe sipër janë 3 dhoma. Më ka çuar në Palasë “Arkitekti” dhe më pas ai është kthyer. Unë Albinën e kam takuar atje, e cila qëndronte me qira në një ambient tjetër.
Sipas SPAK: Nga komunikimi i “Arkitektes” me ish-bashkëshorten e Arben Ahmetajt rezulton se mes tyre janë shkëmbyer shumë fotografi që lidhen me porositjen e disa karrigeve dhe ndricuesave e disa artikujve elektroshtëpiakë për apartamentin e kthyer në ambient hotelier.
Në datën 20.05.2020 ish-bashkëshortja e Ahmetajt i kërkon “Arkitektes” që të komunikojë me “Financieren” e firmës “X” dhe kjo e fundit të mos lëshojë më faturat në emër të kompanisë “Integrated Technology Services”, (shoqëri e përfaqësuar nga Klodian Zoto) por të lëshohen në emër të “Arkitektes”.
Sa i përket vilës në Hamallaj, Gjiri i Lalzit, sipas SPAK: Nga kontrolli i kryer në zyrën e “Arkitektëve” është gjetur një document, project për apartamentin që i përkiste prindërve të bashkëjetueses së Arben Ahmetajt. Ata e kanë blerë në vlerën 130 mijë euro nga “Këshilltari” i Arben Ahmetajt, më pas ja kanë kaluar me kontratë dhurimi vajzës së tyre, bashkëjetueses së Ahmetajt.
