Deklarata e presidentit të Shteteve të Bashkuara, Donald Trump, për një kërkesë armëpushimi nga Irani ka krijuar paqartësi lidhur me identitetin e zyrtarit iranian që ai përmend.
Në postimin e tij në Truth Social, Trump i referohet “presidenti i regjimit të ri” në Iran, pa e identifikuar atë me emër.
Sipas raportimeve të mediave ndërkombëtare, më herët gjatë javës Trump ka konfirmuar se SHBA është në kontakt me kryetarin e parlamentit iranian, Mohammad Bagher Ghalibaf. Megjithatë, ai nuk mban postin e presidentit dhe nuk konsiderohet figurë më e moderuar krahasuar me udhëheqësit e mëparshëm.
Ndërkohë, presidenti aktual i Iranit, Masoud Pezeshkian, i cili mban detyrën që nga viti 2024, deklaroi se vendi i tij është i gatshëm të pranojë një armëpushim, por vetëm nëse sigurohen garanci për sigurinë dhe për të shmangur sulme të reja.
Deklaratat e fundit tregojnë gjithashtu një ndryshim në qëndrimin e Trump lidhur me Ngushticën e Hormuzit.
Javën e kaluar, ai paralajmëroi se SHBA mund të godasë objektet energjetike të Iranit nëse nuk garantohet kalimi i sigurt i anijeve përmes ngushticës. Ndërsa së fundmi, ai ka deklaruar se Shtetet e Bashkuara janë të gatshme t’i japin fund konfliktit edhe pa u zgjidhur kjo çështje, duke theksuar se vendet e tjera duhet të marrin përgjegjësi më të madhe, pasi preken më drejtpërdrejt nga situata.
