Autori portugez që kreu vrasjen e biznesmenit dhe politikanit Ardian Nikulaj përdori një motor të blerë nga e fejuara e Edmond Haxhisë.
Hetuesit që po merren me zbardhjen e kësaj çështje, më 21 prill 2023, në një faqe shitje-blerjesh kanë konstatuar njoftimin për shitjen e një motori, identik me karakteristikat e motorit që u përdor në vrasjen e Nikulajt në Shëngjin.
Në këtë njoftim të datës 28 Mars thuhej:
“…shes motor “Yamaha X Max…”.
Edhe pse në të njëjtën ditë është kryer shitja, njoftimi nuk është fshirë nga faqja online. Hetuesit kanë arritur të marrin numrin e telefonit të shitësit dhe disa fotografi të motorit. Shitësi që jetonte në zonën e “21 dhjetorit” në Tiranë ka treguar se motorin ja kishte shitur një vajze, kundrejt çmimit prej 1800 euro.
Më pas, hetuesit kanë zbuluar se kjo vajzë qē bleu motorin ishte e fejuara e Edmond Haxhisë, hasmit të Nikulajt, i cili rezulton të ketë hyrë në Shqipëri në muajin Nëntor 2022, periudhë me të cilën dhe ishte fejuar me mblesëri.
Kjo vajzë kur është marrë në pyetje nga policia e Lezhës ka treguar se ajo ka blerë motorin dhe eurot i ka marrë nga i fejuari i saj, Edmond Haxhia.
Por ky i fundit i fundit që prej mbrëmjes së 20 Prillit nuk ndodhej më në territorin shqiptar. Pasi u sigurua se portugezi dhe 4 anglezët kishin dalë jashtë kufijve të Shqipërisë, ai u largua edhe vetë. Haxhia ka lënë në Shqipëri vetëm të fejuarën e tij, e cila tashmë është njeriu i vetëm që ka treguar çfarë dinte rreth lëvizjeve të motorit.
Ky motor i përdorur në vrasjen e Nikulajt, është gjetur ditën e sotme në lumin Drin, rreth 100 metra larg banesës së Edmond Haxhisë në fshatin Kakarriq.
Në lidhje me vrasjen e Nikulajt, janë shpallur në kërkim Edmond Haxhia, Ruben Saraiva, Harry Simson, Thomas Mithan, Steven Hunt dhe Harriet Bridgeman.
