Shkruan Bleona Dallaveraj
Reagime të ashpra ka ngjallur marrëveshje e arritur të shtunën mes kryeministrit Albin Kurti dhe presidentit Aleksandër Vuçiq, në Ohër të Maqedonisë së Veriut. Krerët e partive opozitare, e kanë quajtur mashtrim dhe vazhdim të konfliktit të ngrirë me Serbinë. Madje, kryeministri kosovar është cilësuar edhe si tradhëti ndaj Kosovës.
Opozita, shoqëri civile, ish-kryenegociator e shumë personalitete tjera kanë reaguar ashpër ndaj marrëveshjes së arritur në Ohër, të shtunën, mes kryeministrit Albin Kurti e presidentit Aleksandër Vuçiq.
Krerët opozitarë, kanë thënë se gjithçka që kishte premtuar se nuk do e pranonte Kurti, lëshoi pe ndaj Serbisë.
Kryetari i partisë më të madhe opozitare PDK-së, Memli Krasniqi ka thënë se pranimi i aneksit të zbatimit të planit evropian, është i dëmshëm për Kosovën dhe së këtë më së rëndi do ta përjetojnë brezat e ardhshëm.
“Përtej mashtrimeve të tij, brenga ynë mbetet Kosova, qytetarët tanë dhe brezat e ardhshëm, të cilët, fatkeqësisht, përveç që e kanë humbur besimin në perspektivën që ofron Kosova, do ta trashëgojnë për vite me radhë konfliktin e ngrirë me Serbinë. Marrëveshja pa njohje reciproke, e përqendruar në një asociacion të avancuar e autonomi politike për komunitetin serb dhe pa garanci për integrimin euro-atlantik të Kosovës është dështim i madh politik e kombëtar, të cilin do ta paguajmë shtrenjtë dhe gjatë, të gjithë.”, ka shkruar Krasniqi.
Për ndërrime qëndrimesh të parin e shtetit e kanë kritikuar edhe nga LDK-ja.
Kryetari i saj Lumir Abdixhiku ka thënë se pajtimi i Kurtit të shtunën në Ohër, Kosovës i shtoi shumë derisa këtë të fundit e ka quajtur edhe mashtrues.
“Mashtrim dhe humbje e një mundësie historike – ky është epilogu i Kurtit si kryeministër në dialog. Një kauzë politike e rremë – që Kosovës i kushtoi tmerrësisht shumë – përfundoi sonte. Kushtet e vëna, fjalimet e thëna, qëndrimet e dhëna, thjeshtë u zhbënë. Përveç saj, një marrëveshje pa njohje, jo finale dhe me asociacion plus në të është çfarë Kurti i solli Kosovës sot. Kjo gjendje e re, e shndërruar si detyrim integrues për vendin tonë, është e pariparueshme më.”, ka shkruar Abdixhiku.
Ish krye negociatorja e bisedimeve mes Kosovës dhe Serbisë, Edita Tahiri ka thënë se Kryeministri Kurti ka bërë gabim historik, derisa i ka ftuar deputetët e Kuvendit ta përmirësojnë, siç ka thënë ajo, këtë gabim të tij.
“Kosova e fitoi luftën ndaj Serbisë, Kryeministri Kurti e dështoi Kosovën në tavolinë historikisht dhe strategjikisht. Pranoi marrëveshjen pa njohje me Serbinë, me asociacion dhe autonomi për pakicën serbe. Kuvendi i Kosovës dhe deputetët duhet ta bëjnë korigjimin e këtij dështimi historik duke mos miratuar këtë marrëveshje; të mos lejojnë këtë kapitullim të Kosovës përballë Serbisë, por ta jetësojnë kapitullimin e Serbisë në Kumanovë në 1999, të cilën e arritëm me luftën, gjakun dhe diplomacinë e mençur të shqiptarëve.”, tha Edita Tahiri – Ish negociatore e Dialogut Kosovë Serbi.
Frashër Krasniqi i PSD-së ka thënë se kryeministri Kurti nuk ka mandat për këtë marrëveshje.
Takimi Kurti-Vuçiq në Ohër ishte i dyti me radhë brenda një muaji, pas atij të zhvilluar në Bruksel me 27 shkurt, ku edhe u pajtuan për propozimin evropian për normalizimin e raporteve mes dy vendeve./Gazeta10
