Kryetari i Partisë së Lirisë, Ilir Meta, i bëri thirrje Kuvendit të verifikojë shëndetin mendor të Kryeministrit Rama dhe të marrë masa për t’i bërë atij, testin e drogës.
Pas shembjeve që qeveria urdhëroi në resortin turistik “Prestige”, pronë e një grupi mediatik, Ilir Meta doli në një konferencë shtypi në të cilën ndër të tjera tha:
“Akti i sotëm ishte demonstrim total i shkatërrimit të shtetit ligjor, ku edhe vendimet që këta i kanë miratuar vetë, madje edhe projektet që i kanë ideuar vetë pikërisht atje, nuk kanë asnjë vlerë përballë çmendurisë skizofrenike të Edi Ramës në panik.
Është emergjente që Kuvendi i Shqipërisë të nisë procedurat për të verifikuar shëndetin mendor të tij dhe gjithë evoluimin e kartelave të tij psiqike. Jo vetëm kaq, port ë merren masa edhe për t’i bërë testin e drogës dhe të përdorimit të substancave narkotike, pasi për shkak të detyrës që ka mund të shkaktojë edhe dëme të tjera më të mëdha për sa i takon interesit kombëtar, publik dhe shtetit të së drejtës në vendin tonë. “
Ish-Presidenti Meta nënvizoi në fjalën e tij se “opozita do i përgjigjet dhëmbë për dhëmbë Edi Ramës e do t’i shkulë gjithë dhëmbet e dhëmballët e korruptuar të Ramës. E dimë të gjithë trimërinë dhe guximin e lepurushit Edi Rama. Të jetë i sigurtë që opozitën do ta ketë ballë për ballë. Tani e ka humbur edhe mundësinë të thotë “qafsha mamin nuk e bëj më”. Nuk ka për të qenë Shqipëria çiflig i Edi Ramës. Shumë shpejt Edi Rama do i nënshtrohet llogaridhënies, ai bashkë me rruspat e tij”.
