Ish-ministri i Jashtëm Paskal Milo, mesazhet e kryeministrit Edi Rama në mbledhjen e sotme me kabinetin qeverisës dhe grupin parlamentar socialist, për zyrtarët e korruptuar, i cilësoi si parapritë për ndonjë arrestim tjetër të bujshëm në radhët e eksponentëve socialistë.
Nga studio e lajmeve të MCN TV, ai deklaroi se mesazhet e kreut të qeverisë nuk janë të reja, pasi janë përsëritur herë pas here qëndrime të tilla lidhur me luftën kundër korrupsionit, por edhe në radhët e Partisë Socialiste.
Sipas tij, sot u artikuluan me një theks më të veçantë, por nuk sheh ndonjë risi ose fenomen që nuk është identifikuar më parë dhe se tema qendrore ishte lufta kundër korrupsionit e cila është marrë dhe rimarrë disa herë nga Edi Rama.
“Tema është rimarrë sidomos gjatë muajve të fundit kur eksponentë të veçantë socialistë janë paraqitur para drejtësisë për të dhënë llogari për veprimtaritë e tyre korruptive.
Nuk kemi ndonjë element të ri që të sillte deklarata kaq të forta.
Është një fjalim i mirëmenduar për tu thënë sot, por që vjen si rrjedhojë e akumulimit të një numri akuzash që janë bërë ndaj eksponentëve të veçantë të Partisë Socialiste dhe qeverisë.
Ka gjetur momentin tani për ti artikuluar më me forcë, pasi mund të ndodhemi para ndonjë arrestimi tjetër të ndonjë eksponenti të PS, mund të ndodhemi përpara ndonjë shpërthimi tjetër korruptiv të qeverisë socialiste.
Kryeministri Rama patjetër që ka informacione të klasifikuara, se për shkak të detyrës informohet për informacione sekrete.
Është i pari mes të gjithëve në piramidën qeveritare që ka të drejtën të njihet, jam i sigurt që ka informacione të klasifikuara që i jepen nga shërbimet sekrete dhe agjencitë qeveritare që kanë për detyrë të luftojnë korrupsionin.
Është ende herët për të parë se cilin do ketë në fokus SPAK në radhën e qeverisë, apo eksponentë të Partisë Socialiste.
Nuk e përjashtoj mundësinë që mund të ketë dhe mendoj se do ketë, por se cili emër i përveçëm do jetë para togave të drejtësisë, e kam të vështirë se nuk dua të paragjykoj”, deklaroi Milo.
I pyetur nëse ka një divorc politik mes Edi Ramës dhe Erion Veliajt, Milo u shpreh se kryeministri e përjashtoi këtë ide jo thjesht drejtpërdrejt në marrëdhënie me zotin Veliaj, por e përjashtoi si fenomen që të ketë marrëdhënie të posaçme me anëtarët e qeverisë së tij, duke ua bërë të qartë që në fillim se kush do hajë kumbulla do i mpihen dhëmbët.
“Fjalimi i sotëm i zotit Rama, rreth paralajmërimeve u bë më me forcë, se ka pasur shumë fakte që e kanë detyruar të bëjë një gjë të tillë dhe pse jo mund të ketë edhe fakte që ende nuk kanë dalë në dritën e diellit.
Ai bën një deklaratë të tillë ndaj ministrave të vetë dhe eksponentëve të Partisë Socialiste, që të mos pritet që të strehohen nën ombrellën e PS.
Rama paralajmëron strukturat e tij që të përgatiten edhe për ndonjë goditje tjetër.
Opozita e interpreton në funksion të objektivave të saj politike, aq më tepër që e konkretizon me protesta në terren para bashkisë.
Një kryeministër dhe një shef partie, patjetër që shqetësohet kur nga radhët e partisë që administron dhe qeverisë që administron ndihet i shqetësuar kur përballet me një fenomen të tillë që gërryen autoritetin e qeverisë së tij dhe autoritetin e tij.
Ky shqetësim vjen edhe se mund të ketë në një të ardhme të afërt edhe ngjarje të tilla të kësaj natyre dhe përpiqet që ta ndalë këtë fenomen gërryes të Partisë Socialiste dhe qeverisë socialiste.
Po hyjmë në vitin zgjedhor dhe nëse kjo rrjedhë negative në radhët e Partisë Socialiste nuk ndalet, do të ketë një kosto politike. Zoti Rama po i paraprin”, u shpreh Paskal Milo.
