Këshilli për Rregulloren, Mandatet dhe Imunitetin do të shqyrtojë sot në orën 14:00 dosjen e deputetes Olta Xhaçka për konstatimin e pavlefshmërisë dhe mbarimit të mandatit të deputetes socialiste.
Rreth 14 muaj më parë, gjykata vendosi pushimin e çështjes pasi 1/5 e deputetëve të Kuvendit pjesë e opozitës kërkuan shfuqizimin e vendimeve të Kuvendit, i cili nuk miratoi raportin e PD-së që pretendon se deputetja Xhaçka ishte në papajtueshmëri të ushtrimit të mandatit të saj për shkak të statusit si investitor strategjik që kishte përfituar familjari i saj. Në 18 janar të një viti me parë Gjykata Kushtetuese e pushoi gjykimin e çështjes, pasi më parë sipas Kushtetueses do të duhet të shprehet Kuvendi.
Vetë kryetarja e Gjykatës Kushtetuese në daljen e saj publike para mediave për herë të parë për vitin 2024 kur u pyet për mandatin e Olta Xhaçkës deklaroi: “Të vësh në pikëpyetje zbatimin e një vendimi të Gjykatës Kushtetuese është e paimagjinueshme në një shtet ligjor”.
Këshilli për Rregulloren, Mandatet dhe Imunitetin përbëhet nga 10 deputetë, në përfaqësim të barabartë mes shumicës dhe pakicës parlamentare, i cili verifikon mandatin e deputetit. Kryetarja e Kuvendit njoftoi dy javë më parë se Këshilli për Legjislacionin kishte marrë në shqyrtim vendimet e GJK dhe në datën 8 prill në kryesinë e Kuvendit, dosja Xhaçka do të parashtrohet sërish në Këshillin e 10 deputetëve.
Përballë njeri-tjetrit në këtë Këshill do të jenë Bledi Çuçi, Gazment Bardhi, Enkelejd Alibeaj, Ervin Salianji, Klotilda Bushka, Arben Pëllumbi dhe Ermonela Felaj. Dy ditë pas arrestimit të kryebashkiakut në detyrë të Himarës, Jorgo Goro për çështjen e tjetërsimit të tokave në bregdet, prej të cilave ka përfituar dhe ish-deputeti i PS, Artan Gaçi, bashkëshorti i ish-ministres së Jashtme, Olta Xhaçka, Gazment Bardhi dorëzoi një shkresë në Kuvend. Në shkresën e tij, krye i deputetëve të PD-së iu drejtua më 25 mars Kuvendit të Shqipërisë që të zbatojë vendimin e GJK për mandatin e deputetes Xhaçka, i cili nuk zbatohet prej 1 viti e 2 muajsh.
“Të kujtoj se mos zbatimi i vendimeve të GJL përbën vepër penale. Në shkelje të Kushtetutës ju si kryeparlamentare dhe si mazhorancë po refuzoni të zbatoni vendimin e GJK. Keni nxjerrë justifikime absurde nga janari i vitit 2023 e deri më sot. Kjo praktikë e Gjykatës Kushtetuese është praktikë e njohur, por ju bëni sikur nuk e kuptoni dhe e zvarrisni”, tha Bardhi pak ditë më parë.
Në kërkesën e tij, Bardhi shprehet se pengimi i zbatimit të vendimit të GJK për rastin e mandatit të deputetes Xhaçka, vjen pas evidentimit të qartë të faktit se familja e saj ka përfituar statusin e investitorit strategjik me firmë të kryeministrit Rama, epror i saj, në kushtet flagrante të shkeljes së ligjit dhe konfliktit të interesit. Në fund të muajit janar të vitit të kaluar GJK shfuqizoi si antikushtetuese dy vendime të Kuvendit për të bllokuar dërgimin në këtë gjykatë të mandatit të deputetes Xhaçka, por kur ka kaluar më shumë se një vit këto vendime nuk janë zbatuar ende nga Kuvendi.
Të dyja grupimet e Partisë Demokratike iu drejtuan me kërkesa të veçanta Kushtetueses duke kërkuar rrëzimin e vendimit të Kuvendit dhe interpretimin në themel të çështjes. Gjykata vendosi të pranojë kërkesën e 1/10 së deputetëve dhe riktheu çështjen në Kuvend, duke e cilësuar antikushtetues vendimin e mazhorancës që bllokonte dërgimin e çështjes në Kushtetuese.
Në vendimin tjetër, Gjykata Kushtetuese pushoi kërkesën e 1/5 së deputetëve që kërkonin trajtimin në themel të çështjes dhe marrjen e një vendimi për papajtueshmërinë e mandatit, duke mos e legjitimuar si subjekt që vë në lëvizje gjykatën për këtë çështje. Xhaçka mbante detyrën e Ministres së Jashtme deri në fillim të shtatorit, kur kryeministri Edi Rama njoftoi shkarkimin e saj pa asnjë argumentim.
Statusi “investitor strategjik” për bashkëshortin e saj u firmos nga Rama dhe disa ministra, anëtarë të Komitetit për Investimet Strategjike, ndërsa më vonë me vendim qeverie iu dha e drejta e përdorimit afatgjatë të brigjeve të detit dhe plazhit përballë hotelit. Kompania e Gaçit mori në mars të vitit 2021 statusin ‘investitor strategjik’, por në korrik 2021, Komiteti i Investimeve Strategjike ia kaloi përfitimet e statusit, kompanisë “AGTÇ Hotel Managment”, që më pas u zbulua se i përkiste kunatës së Xhaçkës. Statusi “investitor strategjik” parashikon përfitime publike për fituesin, reduktim të TVSH-së procedura të përshpejtuara administrative, akses në infrastrukturë dhe rrjetin elektrik, si dhe përdorimin e tokës shtetërore si plazh para hotelit. Panorama
