Shkruan Avokat Arben Llangozi
Ish-zëvendëskryeministri Arben Ahmetaj ka bërë mbrëmjen e kaluar deklarata të forta publike, ku ka pretenduar se zotëron dokumente dhe prova që, sipas tij, tregojnë për afera të rënda korruptive në nivelet më të larta të qeverisjes.
Gjatë daljes së tij mediatike, Ahmetaj akuzoi kryeministrin Edi Rama për përfshirje në disa çështje që lidhen me vendimmarrje të dyshimta dhe interesa klienteliste, duke ngritur pikëpyetje mbi rolin e institucioneve të drejtësisë, përfshirë SPAK dhe Byronë Kombëtare të Hetimit.
Sipas Ahmetajt, disa prej këtyre çështjeve janë të njohura prej vitesh nga organet hetimore, por nuk kanë çuar në veprime konkrete penale. Ai sugjeroi se ekziston një mbulim institucional ose mungesë vullneti për të hetuar figurat e larta politike.
Nga ana tjetër, deri në këto momente, SPAK dhe BKH nuk kanë bërë asnjë reagim zyrtar lidhur me pretendimet e Ahmetajt. Po ashtu, nuk ka asnjë njoftim publik që konfirmon hapjen e një hetimi penal ndaj kryeministrit Edi Rama mbi bazën e këtyre deklaratave.
Arben Ahmetaj, i vetëm dhe nga jashtë sistemit, ka hedhur akuza që, nëse do të hetoheshin seriozisht, do të trondisnin themelet e pushtetit, ndërsa SPAK akuzohet se është shndërruar më shumë në një strukturë me publicitet dhe arrestime selektive sesa në një institucion real të drejtësisë së pavarur, duke humbur besimin e një pjese të opinionit publik që e sheh atë të paaftë ose të pavullnetshëm për të hetuar figurat më të fuqishme politike.
