Gjykata e lartë e OKB-së ka urdhëruar që Izraeli të marrë të gjitha masat për të parandaluar aktet gjenocide në Gaza, por nuk ka urdhëruar një armëpushim të menjëhershëm.
Gjykata ka thënë të premten se ka juridiksion për të vendosur për masa urgjente, të kërkuara nga Afrika e Jugut, në rastin kundër Izraelit, në luftën e tij kundër Hamasit në Gazë.
Hamasi, grup palestinez që udhëheq Rripin e Gazës, është shpallur organizatë terroriste prej Shteteve të Bashkuara dhe Bashkimit Evropian.
Një vendim mbi gjenocidin mund të duhen vite për t’u provuar, por urdhri për luftën në Gaza që Pretoria i kërkoi GJND-së mund të vijë shumë më shpejt.
“Gjykata konsideron se situata katastrofike humanitare në Rripin e Gazës është në rrezik serioz të përkeqësimit të mëtejshëm përpara se gjykata të japë vendimin e saj përfundimtar.Gjykata vlerëson se ekziston një urgjencë në kuptimin që ekziston një rrezik real dhe i menjëhershëm që do t’u shkaktohet paragjykimit të pariparueshëm të drejtave të gjetura nga gjykata si të besueshme përpara se të japë vendimin e saj përfundimtar.” thuhet në vendimin e Gjykatës Ndërkombëtare.
Afrika e Jugut i kërkoi gjykatës të lëshonte ” masa të përkohshme ” duke urdhëruar Izraelin të ndalonte luftën e tij, për të cilën tha se ishte “e nevojshme në këtë rast për t’u mbrojtur nga dëmtimi i mëtejshëm, i rëndë dhe i pariparueshëm ndaj të drejtave të popullit palestinez”.
Ndërkohë, mediat amerikane raportojnë se kreu i CIA-s do të takohet në ditët në vijim me zyrtarë izraelitë, të Katarit dhe egjiptianë për të diskutuar një armëpushim të ri të mundshëm në Gaza.
Sulmet hakmarrëse të Izraelit në Gaza kanë vrarë 25,900 njerëz, kryesisht gra dhe fëmijë, thotë ministria e shëndetësisë e drejtuar nga Hamasi.
Lufta aktuale filloi pasi Hamasi sulmoi Izraelin jugor më 7 tetor 2023, duke vrarë rreth 1300 njerëz, kryesisht civilë dhe duke marrë 240 persona pengje.
