Kur kanë mbetur edhe pesë muaj nga përfundimi i mandatit të drejtueses së Byrosë Kombëtare të Hetimit, ethet e garës kanë nisur larg syrit dhe vëmendjes së opinionit publik.
WebLajm.com mëson ekskluzivisht se pak javë më parë, në protokollin e Këshillit të Lartë të Prokurorisë është depozituar kërkesa për një mandat të dytë nga drejtuesja aktuale, Aida Veizaj Hajnaj.
Përzgjedhja e kreut të BKH-së bëhet nga Këshilli i Lartë i Prokurorisë pas propozimit të drejtuesit të SPAK dhe komisionit me dy hetues me më shumë eksperiencë. Zyrtarisht, KLP nuk ka bërë asnjë njoftim, ndërsa WebLajm.com mëson se përgjigja e kthyer drejtueses aktuale është se kandidimi nuk pranohet, pasi ende nuk është hapur gara dhe kandidimi duhet të kalojë nga komisioni i ngritur në SPAK.
Ky është vendimi i emërimit të drejtueses aktuale në postin e saj. Me nr. 183, datë 30.07.2020, për herë të parë, Hajnaj u zgjodh në këtë post me një mandat 5-vjeçar.
Ky mandat përfundon më 31 Gusht 2025, ndërsa ende SPAK nuk e ka hapur garën për vijimin e mandatit të Hajnajt apo zgjedhjen e një drejtuesi të ri.
Çfarë është BKH dhe si zgjidhet Drejtuesi?
BKH (Byroja Kombëtare e Hetimit) është një institucion i pavarur hetimor në Shqipëri, i ngjashëm me FBI-në në SHBA. Ajo funksionon si pjesë e Strukturës së Posaçme Kundër Korrupsionit dhe Krimit të Organizuar (SPAK) dhe ka për detyrë të hetojë rastet e korrupsionit të nivelit të lartë dhe krimit të organizuar.
LIGJI
Nr. 95/2016
PËR ORGANIZIMIN DHE FUNKSIONIMIN E INSTITUCIONEVE PËR
TË LUFTUAR KORRUPSIONIN DHE KRIMIN E ORGANIZUAR
(Ndryshuar me ligjin 47/2021)
Neni 33 – Drejtori i Byrosë Kombëtare të Hetimit
Drejtori i Byrosë Kombëtare të Hetimit është përgjegjës për funksionimin e Byrosë Kombëtare të Hetimit.
Komisioni i përbërë nga Drejtuesi i Prokurorisë së Posaçme dhe dy prokurorë të posaçëm me më shumë vite eksperiencë pune si prokurorë, pas një procesi rekrutimi të hapur dhe transparent, rekomandojnë një kandidat për Drejtor të Byrosë Kombëtare të Hetimit, i cili emërohet nga Këshilli i Lartë i Prokurorisë. Drejtori emërohet për një mandat 5-vjeçar, me të drejtë riemërimi vetëm një herë.
Kandidatët për Drejtor të Byrosë Kombëtare të Hetimit duhet të përmbushin kushtet e sigurisë të nenit 6 të këtij ligji. Një kandidat nuk mund të caktohet në detyrë si Drejtor i Byrosë Kombëtare të Hetimit pa përmbushur kushtet e sigurisë dhe kushtet e aftësive profesionale.
Drejtori i Byrosë Kombëtare të Hetimit, pas përfundimit të mandatit, gëzon të drejtën të kthehet në pozicionin e mëparshëm ose të emërohet në një pozicion të të njëjtit nivel, me një gradë që i korrespondon atij funksioni.
Drejtori mbikëqyret nga një komision i përbërë prej tre prokurorësh të Prokurorisë së Posaçme, njëri prej të cilëve është drejtuesi i saj, ndërsa dy të tjerët zgjidhen çdo vit me short.
Drejtori, me pëlqimin e Drejtuesit të Prokurorisë së Posaçme, përzgjedh nga radhët e hetuesve një zëvendësdrejtor. Zëvendësdrejtori vepron në emër të drejtorit në mungesë të tij.
Drejtori cakton hetues për të drejtuar sektorë brenda Byrosë Kombëtare të Hetimit, në përputhje me urdhrin e përbashkët të nxjerrë në bazë të nenit 31, pika 2, të këtij ligji.
Aktualisht BKH drejtohet nga Hajnaj dhe zv.Drejtuesi Jon Keta. Pas një gare të hapur nga SPAK në korrik 2024, shtatë hetues aplikuan për pozicionin e zv.drejtuesit: Maksim Begaj, Mentor Cuku, Jon Keta, Armando Salla, Alban Kalaja, Julian Marko dhe Erjon Tema dhe zv.Drejtues u zgjodh Jon Keta.
Teksa është hera e dytë që do të garohet për një mandat drejtuesi të BKH-së, rezulton se Këshilli i Lartë i Prokurorisë ende nuk ka miratuar një rregullore për çeljen e garës dhe afatin se kur hapet.
