Shkruan Zef Bushati
Roli i saj është i rëndësishëm, por vendimmarrja përfundimtare u takon 27 shteteve anëtare të BE-së, të cilat duhet të bien dakord njëzëri. Çfarë bën konkretisht Komisionerja ? Ajo dhe Komisioni Evropian monitorojnë reformat e vendit kandidat, kryejnë procesin e shqyrtimit të legjislacionit, hartojnë raporte progresi, rekomandojnë hapjen e një kapitulli, rekomandojnë mbylljen e përkohshme të një kapitulli. Por rekomandimi i Komisionit nuk është vendim. Kush vendos për hapjen e kapitujve ? Vendos Këshilli i BE-së, pra qeveritë e 27 shteteve anëtare. Për hapjen e një kapitulli ose grup-kapitulli kërkohet unanimitet (dakordësi e të gjitha shteteve). Një shtet i vetëm mund ta bllokojë procesin. Kush vendos për mbylljen e kapitujve? Po ashtu, të gjitha shtetet anëtare duhet të bien dakord. Komisioni mund të thotë: “Shqipëria i ka përmbushur kushtet, rekomandojmë mbylljen e kapitullit”, por nëse qoftë edhe një shtet anëtar kundërshton, kapitulli nuk mbyllet. Egziston e drejta e vetos. Në procesin e zgjerimit, praktikisht çdo shtet anëtar ka të drejtë vetoje. Këtë e kemi parë: me Greqinë ndaj Maqedonisë për çështjen e emrit me Bullgarinë ndaj Maqedonisë së Veriut për çështje historike e gjuhësore, me Hungarinë ndaj hapave të negociatave të Ukrainës. Po për Shqipërinë ? Edhe nëse Komisioni Evropian dhe Marta Kos japin vlerësimin maksimal për Shqipërinë, anëtarësimi nuk ndodh pa miratimin unanim të 27 shteteve anëtare.
Madje, pasi të mbyllen të gjithë kapitujt:
– duhet të miratohet Traktati i Anëtarësimit;
– duhet të japë pëlqimin European Parliament;
– duhet ta miratojnë njëzëri shtetet anëtare;
– në shumë vende kërkohet edhe ratifikim nga parlamentet kombëtare, e në disa raste edhe referendum. Prandaj, kur dëgjojmë deklarata politike si “Shqipëria do të hyjë në BE në vitin 2030”, juridikisht kjo nuk varet vetëm nga Shqipëria dhe as nga Marta Kos. Varet nga përmbushja e reformave dhe, në fund, nga dakordësia unanime e të 27 shteteve anëtare të BE-së.
Promoted Content
