Në protestën e sotme të opozitës ka marrë pjesë dhe kryetari i Partisë së Lirisë Ilir Meta.
Meta tha nga podiumi se Kryeministri i vendit Edi Rama nuk i shpëton dot llogaridhënies për korrupsionin në nivele ndërkombëtare.
Ai theksoi se ka nisur numërimi mbrapsht për largimin përfundimtar të kësaj qeverie të cilën e cilëson “regjim anti-kombëtar”.
“Të nderuar qytetarë të Tiranës dhe në të gjithë Shqipërinë. Kjo protestë historike dhe madhështore është prova e dinjitetit më të lartë qytetar e patriotik, një rezistencë pa kthim me këtë regjim të kalbur e armik të interesit kombëtar. Struci i Rilindjes që është fshehur nga frika e tmerrshme që ka nga përballja me të vërtetën dhe popullin. Në 10 vite e përdori pushtetin vetëm për të kapur pushtetin dhe është i gatshëm të kënaqë çdo mafioz vetëm të shtyjë disa ditë më shumë në pushtet.
Llogaridhënies nuk i shpëton dot edhe pse ka braktisur Kuvendin prej 3 javësh. Do japë llogari për shkatërrimin e Parlamentit dhe për bllokimin e të gjitha iniciativave dhe projektligjeve të opozitës që janë paraqitur në Kuvend. Rama kërkon të shtojë korrupsionin e tij, do japë llogari dhe për bllokimin e komisioneve hetimore, për përjashtimet staliniste të deputetëve të opozitës dhe nga e drejta e tyre që të përfaqësojnë qytetarët. Do japë llogari deri në fund për pengmarrjen e integrimit europian sepse ai i është vënë kundër haptaz shtetit ligjor. E zëvendësoi procesin e integrimit europian me korrupsion ndërkombëtar, siç e di e gjithë bota. Shqiptarët protestojnë sot për dramat familjare. Ky është rezultat i reformave të Ramaformës që janë korrupsion i gjallë.
Numërimi mbrapsht për largimin përfundimtar të së keqes së përbashkët ka filluar, shqiptarët nuk e presin shpëtimin nga askush tjetër perveçse nga dashuria për atdheun e familjen e tyre. Rama është tashmë një subjekt për drejtësinë për vjedhjet me miliarda euro dhe offshore-t e tij. Edi Rama është përgjegjësi kryesor për shpopullimin e Shqipërisë por edhe mbipopullimin e burgjeve, sepse për të rinjtë ai ka dhënë dy alternativa, ose largimin nga vendi ose përfshirjen në aktivite kriminale”, tha Meta.
