Presidenti rus Vladimir Putin deklaroi për mediat ruse se lufta ndaj Ukrainës erdhi si shkak i zgjerimit të paprecedent të NATO-së në kufi me Rusinë, duke shkelut të gjitha marrëveshjet e mëparshme. Ai theksoi se Perëndimi nuk iu përgjigj shqetësimeve të Moskës dhe për këtë arsye ata u detyruan ta merrnin vetë në dorë situatën. Ai theksoi se Rusi e përcakton vetë kërcënimet ndaj sigurisë kombëtare dhe se deklaratat e perëndimit se zgjerimi i NATO-s nuk sjell rrezik për Moskën nuk qëndrojnë.
“Në fund të fundit, për çfarë po diskutonim gjatë gjithë kohës? Ne theksuam se siguria e një kombi ose e një grupi kombesh nuk mund të vijë në kurriz të sigurisë së një tjetri. Ky parim është i sanksionuar në marrëveshjet ndërkombëtare që të gjitha palët i kanë ratifikuar. Megjithatë, në praktikë, çfarë ndodhi? Një zgjerim i NATO-s pas tjetrit. Na siguruan vazhdimisht: ‘Nuk ka asgjë për t’u frikësuar; nuk përbën kërcënim për ju’. Kur shprehëm shqetësimet tona, duke pohuar se besonim se na kërcënonte, cila ishte përgjigja? Asgjë.
Na u tha thjesht, pa asnjë dyshim, se ku të shkonim me mendimet tona. Askush nuk u shqetësua të dëgjonte ose të merrte në konsideratë perspektivën tonë. Ne e dimë më mirë se çfarë na kërcënon dhe çfarë jo. Është e drejta jonë të përcaktojmë shkallën e sigurisë sonë dhe nivelin e kërcënimeve që mund të na afrohen nga njëra anë ose nga tjetra”, tha Putin.
Më tej ai foli edhe sa i takon marrëdhënies me SHBA-në dhe presidentin Donald Trump, për të cilin tha se ka shumë respekt. Putin theksoi se Trump ka bërë një rrugë të gjatë dhe të rrezikshme për t’u rikthyer në pushtet, teksa kujtoi se i kishte mbijetuar dy atentateve.
“Kam respekt të madh për presidentin aktual të SHBA-së. Ai ka bërë një rrugë shumë të gjatë, të vështirë dhe të rrezikshme për t’u rikthyer në pushtet dhe në Shtëpinë e Bardhë. Ne të gjithë e dimë mirë këtë. Ai është një njeri i guximshëm, kjo është e qartë”, tha Putin.
