Pas Presidentit serb Aleksandar Vuçiç i cili ndërpreu papritur vizitën e tij në Shtetet e Bashkuara për shkak të problemeve shëndetësore, Kryeministri sllovak Robert Fico ka anuluar paraqitjet e tij publike të paralajmëruara ditët e fundit, për shkak të përkeqësimit të shëndetit të tij.
Kryeministri i Sllovakisë, Robert Fico ka anuluar papritur orarin e tij të punës disa herë gjatë ditëve të fundit, raportoi televizioni sllovak TV Noviny. Fico nuk u shfaq as në festimet e planifikuara të 1 Majit në Velke Zaluzhya.
“Programi i punës i Kryeministrit të Sllovakisë, Robert Fico, për 1 Maj është anuluar,” tha qeveria sllovake në një njoftim të shkurtër zyrtar, pa dhënë shpjegime të mëtejshme. Kryetari i bashkisë së Velki Zaluzhy, Milan Biro, tha se nuk kishin marrë asnjë informacion në lidhje me arsyen e anulimit.
Ndryshe, si Vuçiç ashtu dhe Fico kishin konfirmuar më parë se do të merrnin pjesë në paradën ushtarake që zhvillohet në Moskë më 9 maj, dhe kjo ishte konfirmuar edhe me protokollin rus, ndërsa sot “sëmundja” e tyre përkthehet vetëm në justifikim për të mos shkuar në Rusi, pas kritikave dhe presioneve nga BE për të mos shkuar në paradën e Putinit mes agresionit rus kundër Ukrainës.
Nga Zyra e Presidentit të Serbisë dhe ajo e Kryeministrit të Sllovakisë ende nuk është konfirmuar anulimi i udhëtimit drejt Moskës, vetëm se Kryetarja e Parlamentit të Serbisë, Ana Bërnabiç, konfirmoi se Vuçiç është shtruar në Spitalin Ushtarak në Beograd dhe se bëhet fjalë për një shqetësim serioz.
