Pak minuta pasi kreu i KQZ vendosi numërimin e votave të bllokuara të Greqisë, është vendosur ndërprerja e procesit të numërimit të zarfeve nga diaspora. Hapja e kutive dhe numërimi i votave do të vijojë nesër në orën 8:30 të mëngjesit.
Më herët, KQZ vendosi që votat e mbërritura nga Greqia, të cilat janë lënë pezull, do të numërohen pasi sipas kryekomisionerit Ilirjan Celibashi, nuk është gjetur asnjë parregullsi në këto kuti.
“Komisioneri Shtetëror i Zgjedhjeve vendosi vazhdimin dhe përfundimin e numërimit e vlerësimit të çdo dokumentacioni zgjedhor të mbërritura jashtë territorit të Shqipërisë në Komisionin Qendror të Zgjedhjeve, si edhe tabulimin e rezultateve përkatëse për subjektet zgjedhore, kandidatët që i janë nënshtruar votimit preferencial për çdo qark.
Ky urdhërim i Komisionerit përfshin edhe zarfet (e mbërritura nga Greqia) të cilat nuk janë shqyrtuar dhe janë administruar sipas vendimit të KSHZ nr. 1121, datë 12.05.2025”, njofton kreu i Komisionit Qendror të Zgjedhjeve.
Ndërkohë ka përfunduar numërimi për të gjitha votat e tjera të ardhura nga diaspora.
