Gjyqtarja e Posaçme Irena Gjoka deklaroi në seancën gjyqësore ndaj ish-ministrit të Mbrojtjes Fatmir Mediu, i cili është i pandehur për tragjedinë e 15 marsit 2008 në Gërdec, se do të paraqesë kërkesën për heqje dorë nga gjykimi i çështjes.
Sipas procedurës, kërkesa do t’i paraqitet zv.kryetarit të Gjykatës së Posaçme, për shkak se Gjoka pretendon se nuk mundet të vijojë shqyrtimin e dosjes penale, pasi ka qenë gjyqtare e seancës paraprake.
Sipas ligjit, zv.kryetari e shqyrton kërkesën e Gjokës dhe nëse kjo kërkesë pranohet, procesi ndaj ish-ministrit Mediu rikthehet nga e para.
Fatmir Mediu akuzohet si një nga përgjegjësit e Gërdecit, ku nga shpërthimi i punishtes së demontimit të armëve, humbën jetën 26 persona dhe u plagosën dhjetra të tjerë.
