Kryeministri Edi Rama ka kufizuar komentet në profilin e tij zyrtar në Facebook, pas një vale reagimesh kritike ndaj postimeve të tij në rrjetin social.
Lëvizja u vu re veçanërisht pas publikimeve që lidhen me koncertin e Kanye West, ku shumë përdorues kërkuan shpjegime për fondet publike të përfolura për organizimin e aktivitetit. Pas shtimit të komenteve kritike, mundësia për të komentuar në disa prej postimeve rezulton e kufizuar.
Vendimi ka nxitur reagime në rrjetet sociale, ku kritikët e kanë interpretuar si një përpjekje për të shmangur debatin publik dhe për të kufizuar reagimet e qytetarëve në platformën e kryeministrit.
Zhvillimi vjen në një kohë kur qeveria po përballet me kritika për një sërë çështjesh, ndërsa diskutimet në rrjetet sociale mbeten një nga hapësirat kryesore të debatit publik.
