Shkruan Vladimir Muçaj
Fushata zgjedhore ka nisur prej ditësh dhe partitë e partiçkat janë turrur për vota. Në teritorin e të gjitha bashkive në vend zhvillohen takime me tum-tame dhe fjalime oratorësh. Më në pah dhe më shumë prezente janë Partia socialiste, partia pa vulë e Berishës dhe ajo me vulë e Enkelejd Alibeaj. Në këtë tapet elektoral janë dhe me dhjetra parti të tjera me dhe pa anëtarë, por me kryetar prej 30 vitesh. Duke parë ecurinë e kësaj fushate zgjedhore krahasuar me të shkuarat në cdo 3 apo 4 vjet sipas kodit konstatojmë një uniformalitet të pandryshueshëm. Dhe pse janë zgjedhje me interesa lokale për zgjedhjen e qytetarit “të parë” të qyteteve (kryebashkiakun) ngjajnë si zgjedhje të përgjithshme politike. E gjithë kjo duket në të gjithë aksesorët e të bërit fushatë. Nëpër takime flasin më shumë kryetarët e partive respektivie, drejtuesit politik. Flasin dhe kandidatët sigurisht por duhet thënë se pikësëpari ata duhet të dëgjohen më shumë në artikulimin e tyre për platformat drejtuese në rang lokal. Jo vetëm kaq! Deri tani nuk kemi parë asnjë përballje kandidatësh në syrin publik. E gjithë kjo qasje fushate sipas meje tregon se asgjë nuk ka ndryshuar në kursin politik të të bërit fushatë e politikë nga aktorët dhe faktorët e angazhuar në këto zgjedhje. Duke parë këtë formë e fushatë zhvilluar në këtë stil të pandryshuar duket sikur në 14 maj votuesit do zgjedhin kryeministrin e ri se sa kryebashkiakun i cili do drejtojë punët e qytetit për katër vitet e ardhshëm. Pse ndodh kështu?! Sipas meje partitë politike në vend nuk janë ende të emancipuara demokratiksht. Mos emancipimi i tyre u shërben interesave të krerëve dhe interesave të tyre. Kjo lloj qasje edhe i mërzit njerëzit përgjithësisht, (nuk e kam fjalën për fanatikët partiakë)…! Nuk e kemi rrokur ende kulturën e duhur politike të të votuarit. Dhe si rrjedhojë ngelemi fatkeqësisht tufa të mëdha që votojmë pa ditur pse dhe për kë?!!
