Gjykatësja Ramona Manglona pranoi deklarimin e tij të fajësisë për komplot për marrjen dhe zbulimin e dokumenteve të fshehta të sigurisë kombëtare të SHBA-së dhe e liroi atë për shkak të kohës që ai kishte shërbyer tashmë në një burg britanik.
Gjatë seancës dëgjimore tre-orëshe, Julian Assange u deklarua fajtor siç kërkohet nga marrëveshja: “Duke punuar si gazetar, inkurajova burimin tim të jepte informacione që pretendohej se ishin të klasifikuara për t’i bërë publike,” tha ai në gjykatë.
“Unë besoja se Amendamenti i Parë e mbronte këtë aktivitet, por e pranoj se ishte … shkelje e Aktit të Spiunazhit,” shtoi Assange.
Themeluesi i WikiLeaks qëndroi i burgosur për pesë vjet në burgun e sigurisë maksimale në Belmars, pasi i kaloi 7 vite në ambasadën e Ekuadorit në Londër.
52-vjeçari Assange do të largohet nga Saipan me avion privat për në Canberra, Australi, i shoqëruar nga ambasadorët australianë në SHBA dhe Britani.
“Sot është një ditë historike”, tha avokatja mbrojtëse Jennifer Robinson. “Është një lehtësim i madh për Julian Assange… për miqtë e tij, familjen, mbështetësit e tij, për ne, për këdo që beson në fjalën e lirë në mbarë botën… që ai tani mund të kthehet në Australi dhe të ribashkohet me familjen”, shtoi ajo.
