Shkruan Christal Hayes, BBC
Juan dhe disa miq u mblodhën në parkingun e një dyqani me materiale ndërtimi pranë Los Anxhelosit, ku shpërthyen protesta kundër ashpërsimit të politikës së emigracionit nga presidenti amerikan Donald Trump.
Zakonisht, takimet e tyre përfshijnë dhjetëra punëtorë të përkohshëm, shumica prej të cilëve janë emigrantë pa dokumente, që kërkojnë punë nga blerësit ose kontraktorët.
Por të dielën, vetëm dy makina të vogla tip pick-up njoftuan se mund të ndihmonin me çatitë, riparime ose pikturë jashtë degës së ‘Home Depot’ në lagjen Paramount, ku më shumë se 82% e banorëve janë me prejardhje hispanike.
Dyqani u bë epiqendra e protestave të emigracionit, të shkaktuara nga thashetheme se punëtorët e përkohshëm aty ishin mbledhur dhe arrestuar.
Shumë nga banorët e komunitetit thanë për BBC se kishin parë automjete të zbatimit të ligjit për emigracionin në zonë.
Kjo shkaktoi frikë dhe panik të menjëhershëm. Më pas erdhën raportet për bastisje dhe arrestime të punëtorëve të përkohshëm në ‘Home Depot’, një vend ku shumë emigrantë pa dokumente në mbarë SHBA-në shkojnë për të gjetur punë.
Protestat shpërthyen në këtë qytet me shumicë hispanike, duke u kthyer në dhunë kur u hodhën gurë dhe koktej molotovi. Autoritetet përdorën spraj piperi, plumba gome dhe bomba tymuese për të qetësuar turmën.
Por demonstratat në Paramount duket se lindën nga keqinformimi.
Ndërsa disa dhjetëra emigrantë janë ndaluar nga autoritetet në zona të tjera të rajonit, thashethemet për bastisje në dyqan rezultuan të jenë keqinformim, sipas Departamentit Amerikan të Sigurisë së Brendshme (DHS).
“Pavarësisht raporteve të rreme, nuk pati asnjë bastisje në një ‘Home Depot’ në LA,” tha DHS për BBC-në.
Duke u mbështetur në pjesën e pasme të një Toyota të vogël së bashku me dy shokët e tij, Juan tha: “Askush nuk e di me të vërtetë se çfarë ndodhi. Të gjithë janë të frikësuar”.
Përplasjet në Paramount, ku një makine iu vu zjarri dhe biznese të tëra u plaçkitën, u bënë shkak për atë që autoritetet federale e kanë përshkruar si trazira në gjithë zonën e Los Anxhelosit.
Të shtunën, Presidenti Donald Trump përdori autoritetin e tij për të thirrur Gardën Kombëtare të Kalifornisë, një vendim që zakonisht merret nga guvernatori i shtetit, ndërsa protestat e ditës së dytë u përshkallëzuan në qytet.
Ndërsa protestat vazhduan, trupat e armatosur të Gardës Kombëtare ruanin një park biznesi të mbyllur përballë dyqanit të pajisjeve.
Ata parkuan Humvee-t duke bllokuar zonën dhe u përballën me protestues që hidhnin fyerje dhe valëvitnin flamuj dhe pankarta me motive meksikane.
“Ju nuk jeni të mirëpritur këtu!” bërtiti një burrë me një kapele të skuadrës Los Angeles Angels ndaj ushtarëve, ndërsa një tjetër protestues hapi spërkatësin dhe shkroi një fyerje ndaj Shërbimit të Emigracionit dhe Doganave të SHBA (ICE).
Departamenti i Sigurisë Kombëtare (DHS) i tha BBC-së se zona e mbrojtur përmban një nga zyrat e tyre dhe autoritetet po e përdornin atë si “pikë organizimi, por protestuesit e gjetën”.
Agjencia tha se ka arrestuar 118 emigrantë të paligjshëm këtë javë në zonën e Los Anxhelosit, përfshirë pesë që i konsideron anëtarë bandash. Disa prej tyre kishin histori kriminale për trafik droge, sulm fizik dhe grabitje.
Të dielën, ndërsa po hipte në Air Force One në Morristown, New Jersey, Trump u tha gazetarëve se në Los Anxhelos kishte “njerëz të dhunshëm” dhe “ata nuk do ta kalojnë pa pasoja”.
Dora Sanchez ishte ende e tronditur nga pamjet që kishin transformuar qytetin e saj një natë më parë. Ajo u takua të dielën bashkë me të tjerë nga komuniteti në kishën ‘Chapel of Change’, vetëm një bllok larg nga qendra e protestave.
Hispanikët, jo vetëm që përbëjnë përqindjen më të madhe të popullsisë në krahasim me çdo grup tjetër etnik, por emigrantët – veçanërisht ata nga Meksika – janë një pjesë thelbësore e historisë dhe kulturës së këtij qyteti.
Los Anxhelos krenohet me statusin e tij si një qytet strehues, që do të thotë se nuk bashkëpunon me autoritetet federale për zbatimin e ligjeve të emigracionit.
Disa prej banorëve thonë se kanë ndier një tension të akumuluar, që shpërtheu kur administrata e presidentit republikan vuri në shënjestër emigrantët pa dokumente në LA.
“Ishte koha të ngriheshim,” tha Maria Gutierrez, që mori pjesë në protestat në Paramount. “Këta janë njerëzit e mi.”
Ajo tregoi se ka lindur në Meksikë, por jeton në SHBA që kur ishte e vogël.
Ajo – si shumë të tjerë – thotë se ka anëtarë të familjes që janë në SHBA pa dokumente.
“Ky është LA,” tha ajo. “Na përket të gjithëve.
“Të gjithë kemi familjarë ose njohim dikë që nuk ka letra.”
