Autoritetet maqedonase kanë zbuluar një fabrikë të kanabisit në qytetin e Ohrit.
Për rastin, janë arrestuar në total 10 persona. Ndër të prangosurit është edhe dhëndri i kryetarit të Bashkisë së Pogradecit Ilir Xhakolli, raportuan mediat maqedonase.
Por, vetë kryebashkiaku i Pogradecit Ilir Xhakolli, në një prononcim për mediat ka deklaruar se dhëndri i tij nuk është arrestuar për drogë. “Jo nuk është e vërtetë”, ka thënë ai shkurtimisht.
Operacioni u krye në fshatin Orovnik të Ohrit ku u zbulua një “shtëpi bari”.
Brenda saj u kapën 3 000 rrënjë kanabisi, 100 litra vaj kanabisi si edhe 600 kg kanabis i thatë, gati për tregtim.
Vlerësimet e para të policisë maqedonase flasin se vlera e drogës së konfiskuar është shumë e madhe.
Fabrika ka qenë e regjistruar si filial i kompanisë “Greenego 2018” nga fshati Drsllajcë i Strugës, por nuk ka pasur licencë për prodhim të marihuanës.
