Një emër me profil të fortë ushtarak pritet të marrë drejtimin e diplomacisë amerikane në Tiranë. Presidenti i SHBA-ve, Donald Trump, ka propozuar gjeneral-lejtnantin në pension Eric P. Wendt si ambasadorin e ri të Shtetet e Bashkuara në Shqipëri.
Emri i tij është dërguar për miratim në Senatin amerikan dhe, nëse konfirmohet, Wendt do të zëvendësojë një boshllëk diplomatik që zgjat prej rreth tre vitesh.
Me mbi 34 vite karrierë në ushtri, Wendt konsiderohet një nga figurat më me përvojë në operacionet speciale. Ai ka qenë pjesë e njësive elitare “Green Beret” dhe ka drejtuar Komandën e Operacioneve Speciale të NATO-s, duke luajtur rol kyç në misione të rëndësishme ndërkombëtare.
Karriera e tij përfshin:
• misione në Lindjen e Mesme dhe rajonin e Paqësorit
• detyrën si koordinator sigurie i SHBA për Autoritetin Izraelito-Palestinez (2017–2019)
• pozicione të larta në strukturat ushtarake amerikane
Wendt është diplomuar në Universitetin e Kalifornisë dhe ka ndjekur studime të avancuara në sigurinë kombëtare. Ai zotëron disa gjuhë të huaja, përfshirë arabishten dhe koreanishten.
Kjo nuk është hera e parë që emri i tij propozohet për një post diplomatik. Ai ishte nominuar më herët edhe si ambasador në Katar, por kandidatura e tij nuk u miratua nga Senati.
Ambasada amerikane në Tiranë ka mbetur pa ambasador të plotë që prej largimit të Yuri Kim në vitin 2023, ndërsa më herët ishte propozuar edhe diplomati David J. Kostelancik, pa arritur konfirmimin përfundimtar.
Nëse emërimi i Eric P. Wendt kalon në Senat, Shqipëria pritet të ketë një ambasador me profil të fortë sigurie dhe përvojë të thellë në operacione ndërkombëtare, duke sinjalizuar një qasje më strategjike të SHBA-ve në rajon.
