Për tri ditë radhazi Policia e Kosovës në aksionet e saj në Zveçan, Zubin Potok dhe Mitrovicë të veriut ka hasur në arsenal armësh të cilat ishin në dy lokacione ishin të fshehura nen toke ndërsa armë u gjetën edhe në çatinë e një ndërtese. Këto konfiskimet sipas Enver Dugollit deputet nga Lëvizja Vetëvendosje njëherësh anëtar i komisionit për çështje të sigurisë, janë mbetje të grupeve kriminale që tentojnë ngritjen e tensioneve. Por, Rashit Qalaj nga PDK ka ngritur shqetësimin se në veri të vendit po hyjnë armë përmes rrugëve ilegale nga Serbia për të ngritur tensione në katër komunat veriore.
U vendosën në mënyrë të fshehtë.
Por Policia e Kosovës, për tre ditë radhazi përmes aksioneve, gjeti këtë arsenal armësh në tri komunat veriore, Zveçan, Zubin Potok e Mitrovicë të Veriut.
AK-47, uniforma ushtarake serbe, granata dore e radiolidhje janë disa nga pajisjet ushtarake të cilat tashmë janë të konfiskuara.
Deputeti nga Lëvizja Vetëvendosje Enver Dugolli thotë se aksioni i Policisë në rajonin e veriut tregon përkushtimin për parandalimin e çdo tendence të grupeve kriminale për të ngritur tensione.
“Kanë bërë hetim, zbulime që preventojnë ndonjë sulm eventual të përmasave siq e kemi parë. Këto janë mbetje të atyre grupeve edhe këto armatime dhe pajisje i përkasin asaj kohe të cilat në vazhdimësi po zbulohen suksesshëm dhe po konfiskohen. Kjo nënkupton se institucionet tona janë në kryer të detyrës po e kryejnë detyrën për mrekulli dhe me profesionalizëm të lartë”, thotë Dugolli
Ndryshe mendon Rashit Qalaj nga PDK.
Ai thotë se situata në komunat e veriut të vendit nuk është aspak e mirë derisa ngriti shqetësime se në atë zonë po hyjnë armë ilegale nga Serbia.
“Në vazhdimësi kemi thënë që situata e Sigurisë në Veri nuk është e mirë absolutisht nuk ka ndonjë ndryshim, meqenëse grupet kriminale dhe kriminelët atje punojnë vazhdimisht në mënyrë ilegale duke sjell armë. Dhe normalisht që ata janë të mbështetur nga strukturat legale të Serbisë duke filluar nga Presidenti e tutje”, shprehet Qalaj
Sipas tij, gjetja e armëve kohëve të fundit në katër komunat veriore, tregon se AKI duhet të jetë më vigjilente pasi që Serbia po tenton ngritjen e tensioneve.
“Mendoj se institucionet tona të Sigurisë duhet të jenë në krye të detyrës në vazhdimësi që të monitorojnë situatën atje në mënyrë fizike poashtu edhe me informata inteligjente, po ashtu mendoj që edhe Agjencioni Kosovar i Inteligjencës duhet të jetë shumë më aktiv shumë më prezente, që të parandalohet hyrja ilegale e armëve dhe pajisjeve eksplozive në veri të vendit” , thotë ai
Ditë më parë kryeministri i vendit, Albin Kurti reagoi në rrjetin social “X” duke thënë se siguria në të gjithë vendin është prioritet për Qeverinë, teksa duartrokiti aksionet e Policisë në veri.
