Një gjest simbolik kundër Partisë Socialiste është regjistruar gjatë protestës së studentëve, ku një qytetar, që deklaron se ka qenë prej vitesh anëtar i kësaj force politike, ka djegur publikisht teserën e anëtarësisë.
I zhgënjyer nga partia që kishte mbështetur për vite me radhë, qytetari shprehu hapur pakënaqësinë ndaj Edi Ramës dhe drejtimit politik të PS-së.
“Jam anëtar i PS, jam rritur me Edi Ramën. Kam qenë me Fatos Nanon, e djeg dhe nuk e dua më PS. Nuk më ka bërë asnjë të drejtë PS”, deklaroi ai.
Ky veprim, i kryer në mes të protestës, përcjell një mesazh të fortë politik: zhgënjimi ndaj qeverisjes nuk shprehet vetëm nga kundërshtarët tradicionalë të pushtetit, por edhe nga qytetarë që deklarojnë se e kanë mbështetur Partinë Socialiste prej vitesh.
Djegia e teserës përfaqëson për këtë qytetar një shkëputje publike nga forca politike me të cilën është identifikuar për një periudhë të gjatë.
REVEAL MEDIA sjell këtë moment si një dëshmi të pakënaqësisë së shprehur gjatë protestës, ndërsa mbetet për t’u parë nëse raste të tilla do të shoqërohen me largime të tjera nga radhët e socialistëve.
